დაახლოებით, 50-მდე კურიერს Glovo-მ აპლიკაციასთან წვდომა შეუჩერა. ინფორმაცია ამის შესახებ On.ge-ს კომპანიაში დაუდასტურეს.

Glovo-ს განცხადებით, კომპანიაში მიმდინარე ცვლილებებმა საბონუსე და ანაზღაურების სისტემებთან დაკავშირებით კურიერების გარკვეული ნაწილის უკმაყოფილება გამოიწვია. კომპანიის განცხადებით, ეს კურიერები დღევანდელი საპროტესტო აქციის დროს აგრესიულად ესხმოდნენ თავს სხვა კურიერებს. მათივე თქმით, დაფიქსირდა სიტყვიერი და ფიზიკური შეურაცხყოფების შემთხვევებიც.

"ასევე გამოვლინდა აპლიკაციის ბოროტად გამოყენების ფაქტები, პარტნიორი კურიერები იღებდნენ და შემდეგ ბლოკავდნენ რესტორნების შეკვეთებს. მოგეხსენებათ, შაბათ-კვირას კვების ობიექტები მხოლოდ მიტანის სერვისის საშუალებით მუშაობენ, შესაბამისად, ამ არაკეთილსინდისიერი ქმედების გამო საკმაოდ დაზარალდნენ რესტორნებიც და მომხმარებლებიც.

Glovo ბოდიშს უხდის მომხმარებლებსა და პარტნიორ რესტორნებს შექმნილი სიტუაციისთვის, მიღებულ ზარალს სრულად აანაზღაურებს, ხოლო იმ კურიერებს, რომლებიც მსგავს არაკეთილსინდისიერ საქციელში და ფიზიკურ თუ სიტყვიერ შეურაცხყოფაში იყვნენ შემჩნეული, დროებით უჩერებს აპლიკაციასთან წვდომას, რადგან ისინი ამას არა სამუშაოდ, არამედ კომპანიის საქმიანობაში ხელის შესაშლელად იყენებენ", — აცახდებენ Glovo-ში.

16 მაისს Glovo-ს კურიერებმა თბილისში აქცია გამართეს. ისინი იმ ცვლილებებს აპროტესტებდნენ, რომელიც კომპანიაში განხორციელდა. მათ შორის, საუბრობდნენ საბონუსე სისტემასა და საათების შემცირებაზე.