პოლიტიკური მოძრაობა დროა კატეგორიულად გმობს დედაენის ბაღში მომხდარ ძალადობრივ ფაქტს და მიუთითებს მთავრობისა და შინაგან საქმეთა სამინისტროს ვალდებულებაზე, ადეკვატური რეაგირება მოახდინონ 17 მაისთან დაკავშირებულ ჰომოფობიურ, ტრანსფობიურ და ბიფობიურ ძალადობრივ შემთხვევებზე, ასევე, უზრუნველყონ საზოგადოების ლგბტქი წევრებისთვის კონსტიტუციური უფლებების უსაფრთხოდ განხორციელება. ამ განცხადებით მოძრაობა ჰომოფობიური და ძალადობრივი ჯგუფის ლიდერის, გურამ ფალავანდიშვილის მიერ დედაენის ბაღში ლგბტქ აქტივისტებზე თავდასხმასა და ინსტალაციის დაზიანებას ეხმაურება.

"წლებია, ვხედავთ, ხელისუფლება და, უმეტესწილად, პრორუსული რადიკალური ჯგუფები როგორ იყენებენ პოლიტიკურ ინსტრუმენტად ლგბტქი თემთან დაკავშირებულ საკითხებსა და თარიღებს. ეს კიდევ ერთხელ უსვამს ხაზს იმას, რომ სახელმწიფო უგულებელყოფს საკუთარი საზოგადოების ლგბტქი მოქალაქეებს, უფრო მეტიც, ხელს უწყობს მათ გარიყვას და დემონიზებას. მსგავსი მიდგომა, რა თქმა უნდა, ხელს უშლის ქვეყნის დემოკრატიულ განვითარებას და სამართლიანი საზოგადოების ჩამოყალიბებას. ამიტომ, კიდევ ერთხელ, მოვუწოდებთ მთავრობასა და შინაგან საქმეთა სამინისტროს, მომდევნო დღეებში მოსალოდნელი აგრესიული ქმედებების პრევენციისთვის, მაქსიმალურად სწრაფად აღკვეთოს და სამართლიანად გამოიძიოს ძალადობრივი ფაქტები", — აღნიშნულია განცხადებაში.

15 მაისს, ლგბტქ აქტივისტებმა ინსტალაცია — ფერადი კაბინა წარწერით welcome to the closet დაამონტაჟეს, სადაც ფალავანდიშვილი მივიდა და ინსტალაცია დააზიანა. ის აქტივისტებს შეურაცხყოფას აყენებდა.

აქტივისტებმა გამოიძახეს პოლიცია, რომელიც ადგილზე დაახლოებით 10 წუთში მივიდა, თუმცა ფალავანდიშვილი არ დაუკავებია და მხოლოდ რამდენიმე მეტრის მოშორებით გადაიყვანა. როგორც ადგილზე მყოფი On.ge-ს ჟურნალისტმა თქვა, მოგვიანებით ჰომოფობიური და ძალადობრივი ჯგუფის ლიდერი განარიდეს თუმცა იქ დარჩა მისი რამდენიმე მხარდამჭერი, რომლებმაც ჰომოფობიური ბანერიც მიიტანეს. მოგვიანებით ცნობილი გახდა, რომ ფალავანდიშვილი გამოკითხვაზე გადაიყვანეს, თუმცა არ დაუკავებიათ. ლგბტქ აქტივისტებზე თავდასხმისა და ინსტალაციის დაზიანების საქმეზე შინაგან საქმეთა სამინისტრომ გამოძიება სისხლის სამართლის კოდექსის 156-ე მუხლით დაიწყო, რაც დევნას გულისხმობს.