ეკონომიკისა და მდგრადი განვითარებია მინისტრის, ნათია თურნავას განცხადებით, სახმელეთო საზღვრების გახსნა კორონავირუსის მესამე ტალღის დასრულების შემდეგ იგეგმება. თურნავა ვარაუდობს, რომ ეს უახლოეს რამდენიმე კვირაში მოხდება.

"სახმელეთო საზღვრების გახსნა, ზოგადად, იგეგმება, მაგრამ, ვადებში ეს უნდა დაემთხვეს აი ამ მესამე ტალღის დასრულებას. ალბათ, უახლოესი რამდენიმე კვირის თემაა", — განაცხადა თურნავამ.

მისი თქმით, სახმელეთო საზღვრების გახსნა ტურიზმის სფეროსთვის მნიშვნელოვანი სტიმული იქნება.

"[სახმელეთო საზღვრების] გახსნა არის ერთ-ერთი მნიშვნელოვანი სტიმული ტურიზმის, იმიტომ, რომ ყოველთვის, ისტორიულად, მეზობელი სახელმწიფოები იყვნენ ერთ-ერთი პირველი კონტრიბუტორები ჩვენთან ტურიზმის. რა თქმა უნდა, ევროპელი ტურისტებიც ძალიან აქტიურად გამოჩნდნენ, სპარსეთის ყურედან ჩამოსული ტურისტები, ისრაელიდან ჩამოსული ტურისტები ძალიან ბევრია, მაგრამ, სამეზობლო ყოველთვის, ტრადიციულად იყო ძალიან მნიშვნელოვანი გამომგზავნი ტურისტების", — განაცხადა ნათია თურნავამ.

დღეს, ნათია თურნავა Sinopharm-ის ვაქცინით, ტურიზმის სექტორის წარმომადგენლებთან ერთად აიცრა.