ომსკის ოლქის ჯანდაცვის მინისტრი ალექსანდრ მურახოვსკი ცოცხალი იპოვეს. ის ტყეში 7 მაისს გაუჩინარდა და ამ დრომდე ეძებდნენ. მურახოვსკი იმ კლინიკის ყოფილი მთავარი ექიმია, სადაც რუსი ოპოზიციონერი, ალექსეი ნავალნი ნოვიჩოკით მოწამვლისას მკურნალობდა.

ომსკის ოლქის მთავრობის ინფორმაციით, მურახოვსკი თავს კარგად გრძნობს. ტელეკომპანია დოჟდს მინისტრის ცოლმა უთხრა, რომ ქმარს ტელეფონით ესაუბრა და ვერ აცნობიერებს "ძებნის მასშტაბს".

წინასწარი ინფორმაციით, 7 მაისს მურახოვსკი სანადირო ბაზიდან კვადროციკლით ტყეში წავიდა ტყეში წავიდა, რის შემდეგაც ის არავის უნახავ. ერთი დღის განმავლობაში მას ახლობლები ეძებდნენ, 8 მაისს კი პოლიციას მიმართეს.

ალექსანდრ მურახოვსკი ომსკის ოლქის ჯანდაცვის მინისტრად 2020 წლის ნოემბერში დაინიშნა. მანამდე ომსკის ერთ-ერთი კლინიკის მთავარი ექიმი იყო, სადაც მოწამვლის შემდეგ ნავალნი შეიყვანეს.

ნავალნი კლინიკაში 20-22 აგვისტოს იყო, რის შემდეგაც ის სამკურნალოდ გერმანიაში გადაიყვანეს. მურახოვსკი ამტკიცებდა, რომ ოპოზიციონერი მოწამლული არ იყო და მისი გართულებული მდგომარეობა მეტაბოლიზმს დაუკავშირა, თუმცა ზუსტი დიაგნოზი არ თქვა. ნავალნის თანამებრძოლები მურახოვსკის კრემლის დავალებების შესრულებაში ადანაშაულებდნენ.