ერთ-ერთი საოჯახო სასტუმრო მარტვილში ვაქცინაციაზე დარეგისტრირებულებს უფასოდ დარჩენას სთავაზობს. როგორც სასტუმროს წარმომადგენლები ლადო დანელია და გვანცა მუჯირი წერენ, ისინი თვითონაც დარეგისტრირდნენ აღმოაჩინეს, რომ 17-24 მაისს თავისუფალი ადგილებია დარჩენილი.

"ვინაიდან პანდემია და მისგან გამოწვეული კოვიდ-19 არის ჯერჯერობით უდიდესი პრობლემა როგორც ჩვენთვის ასევე მთელი მსოფლიოსთვის, ვაქციანაცია არის ჯერჯერობით ერთადერთი გონივრული გამოსავალი არსებული სიტუაციიდან. ძალიან გვინდა ჩვენი მოკრძალებული წვლილი შევიტანოთ არსებული პრობლემის დაძლევაში, ასევე ვაქცინაციის პოპულარიზაციაში", — ნათქვამია სასტუმროს მიერ გავრცელებულ განცხადებაში.

ვინც დარეგისტრირდებით ვაქცინაციაზე მარტვილში 17-24 მაისის შუალედში, სასტუმრო უფასო განთავსებას სთავაზობს (მაქს 4 ადამიანი ერთ ჯერზე), ასევე, უფასოდ მოემსახურებათ გიდი.

საქართველოში ვაქცინაცია 15 მარტს დაიწყო და კონკრეტულ ჯგუფებზე იყო გათვლილი. 4 მაისიდან 18 წლის ზემოთ მოქალაქეებისთვის ხელმისაწვდომი გახდა ჩინური სინოფარმის ვაქცინა, რომელმაც 7 მაისს ჯანმრთელობის მსოფლიო ორგანიზაციის ავტორიზაცია მიიღო.

მაღალი მოთხოვნის გამო დიდ ქალაქებსა და მათ შემოგარენში ადგილები დაჯავშნილია. მოქალაქეები წერენ, რომ ვაქცინის დოზის მისაღებად რეგიონებში ეწერებიან.

ვაქცინაზე რეგისტრაცია შეგიძლიათ ამ ბმულზე: booking.moh.gov.ge