ნაციონალური მოძრაობის პოლიტსაბჭოს წევრის, თინა ბოკუჩავას განცხადებით, სალომე ზურაბიშვილი პრეზიდენტობის განმავლობაში პირველად ცდილობს პოზიციონირდეს, როგორც დამოუკიდებელი აქტორი. ასე შეაფასა მან ზურაბიშვილის მიერ ადმინისტრაციულ სამართალდარღვევათა კოდექსში შეტანილ ცვლილებებზე შესაძლო ვეტოს დადების საკითხის განხილვა ოპოზიციასთან.

"ქალბატონი ზურაბიშვილი, როგორც ერთ-ერთი გარანტორი ამ [შარლ მიშელის] ხელშეკრულების, როგორც ჩვენს საერთაშორისო პარტნიორებს წარმოედგინათ მისი როლი, როგორც ჩანს, ახლა ცდილობს, გარკვეულწილად, პირველად პრაქტიკულად მისი პრეზიდენტობის განმავლობაში, რომ პოზიციონირდეს, როგორც ამგვარი დამოუკიდებელი აქტორი", — განაცხადა თინა ბოკუჩავამ.

ოპოზიციის ნაწილი ადმინისტრაციულ სამართალდარღვევათა კოდექსში შეტანილ ცვლილებებზე პრეზიდენტისგან ვეტოს უფლების გამოყენებას მოითხოვს. სალომე ზურაბიშვილმა ამ საკითხზე სასაუბროდ ოპოზიციური პარტიებთან შეხვედრები გამართა.

დღეს, 7 მაისს, ზურაბიშვილი ასევე შეხვდა შინაგან საქმეთა მინისტრს, ვახტანგ გომელაურსა და უმრავლესობის დეპუტატებს — მიხეილ სარჯველაძესა და მამუკა მდინარაძეს.

ცვლილებები ადმინისტრაციულ კოდექსში

29 აპრილს პარლამენტმა ადმინისტრაციულ სამართალდარღვევათა კოდექსში ცვლილებები მესამე მოსმენით დაამტკიცა. კანონპროექტს საკანონმდებლო ორგანო დაჩქარებულად განიხილავდა. ცვლილებები 2021 წლის პირველი ივნისიდან ამოქმედდება.

ახალი კანონპროექტის თანახმად, ადმინისტრაციულ სამართალდარღვევათა კოდექსში ცვლილებები შედის, რის შედეგადაც წვრილმანი ხულიგნობისა (166-ე მუხლი) და სამართალდამცველის მოთხოვნისადმი დაუმორჩილებლობისთვის (173-ე მუხლი) სანქციები იზრდება.

წვრილმან ხულიგნობაზე პირველი ადმინისტრაციული დარღვევის შემთხვევაში, სანქცია რჩება იგივე, ანუ 500-დან 1000 ლარამდე ჯარიმა ან 15 დღემდე პატიმრობა. განმეორებითი სამართალდარღვევის შემთხვევაში ჯარიმა იქნება 1 500-დან 2 000 ლარამდე ან 5-დან 15 დღემდე პატიმრობა.

რაც შეეხება სამართალდამცველის მოთხოვნისადმი დაუმორჩილებლობისთვის, აღნიშნული სამართალდარღვევა გამოიწვევს დაჯარიმებას 2 000-დან 3 000 ლარამდე ან პატიმრობას 15 დღემდე ვადით. განმეორების შემთხვევაში 3 500 ლარიდან 4 500-ლარამდე ჯარიმა ან 7-დან 15 დღემდე პატიმრობა.

ამასთან ცვლილება ეხება პატიმრობასაც. 247-ე მუხლი ჩამოყალიბდა შემდეგი რედაქციით:

1. ადმინისტრაციული დაკავების დროს, დაკავებული პირი პირველი შესაძლებლობისთანავე, მაგრამ არა უგვიანეს 24 საათისა წარედგინება სასამართლოს.
2. მტკიცებულების მოპოვების მიზნით, ამ მუხლის პირველი ნაწილით გათვალისწინებული ვადა შეიძლება ერთჯერადად გახანგრძლივდეს არაუმეტეს 24 საათით. ამ შემთხვევაში უფლებამოსილი ორგანოს შესაბამისი თანამშრომელი წერილობით ასაბუთებს ადმინისტრაციული დაკავების ვადის გახანგრძლივების მიზანშეწონილობას.
3. თუ დაკავებული პირი ამ მუხლის პირველი ან მეორე ნაწილით გათვალისწინებულ ვადაში არ წარედგინა სასამართლოს, იგი დაუყოვნებლივ უნდა გათავისუფლდეს.
4. დაკავებული პირი სასამართლოსთვის წარდგენამდე უფლებამოსილმა ორგანომ შეიძლება მოათავსოს დროებით მოთავსების იზოლატორში.