პარლამენტის თავმჯდომარის მოადგილე, ლევან იოსელიანი არ გამორიცხავს პრეზიდენტმა ვეტო დაადოს ადმინისტრაციულ სამართალდარღვევათა კოდექსში შეტანილ ცვლილებებს.

"არ გამოვრიცხავ, რომ მან [პრეზიდენტმა] გამოიყენოს ვეტოს უფლება, რადგან ჩემს გარდა შეხვდა სხვა პოლიტიკოსებს, სხვა პოლიტიკურ ჯგუფებს, მოისმინა ყველას აზრი და ალბათ, ფიქრობს ვეტოზე, რახან დაინტერესდა ამ საკითხით", — ამბობს იოსელიანი.

მისი თქმით, თუ პრეზიდენტი მართლაც გამოიყენებს ვეტოს უფლებას, ეს იქნება გზავნილი მმართველი პარტიისთვის, გადახედოს თავის პოზიციას.

"როდესაც გეუბნება ამერიკის საელჩო, რომ ცვლილებები არ პასუხობს იმ სულისკვეთებას, რაც დღეს შეთანხმების საფუძველზე უნდა არსებობდეს ოპოზიციასა და ხელისუფლებას შორის, და თუ პრეზიდენტის გამოიყენებს ვეტოს უფლებას, ეს ყველაფერი, მგონი, ცალსახა გზავნილი იქნება ქართული ოცნებისთის, რომ უნდა გადახედოს იმ ცვლილებებს, რა ცვლილებებსაც მან მხარი დაუჭირა", — განაცხადა იოსელიანმა.

ოპოზიციის ნაწილი ადმინისტრაციულ სამართალდარღვევათა კოდექსში შეტანილ ცვლილებებზე პრეზიდენტისგან ვეტოს უფლების გამოყენებას მოითხოვს. სალომე ზურაბიშვილმა ამ საკითხზე სასაუბროდ ოპოზიციური პარტიებთან, მათ შორის მოქალაქეებთან, შეხვედრები გამართა.

კოდექსის ცვლილებას გამოეხმაურა აშშ-ს საელჩო საქართველოში. ისინი ამბობენ, რომ იმედგაცრუებულები არიან და ამ ცვლილებების დაჩქარებული წესით მიღება არასაჭირო და უსარგებლო იყო.

ცვლილებები ადმინისტრაციულ კოდექსში

29 აპრილს პარლამენტმა ადმინისტრაციულ სამართალდარღვევათა კოდექსში ცვლილებები მესამე მოსმენით დაამტკიცა. კანონპროექტს საკანონმდებლო ორგანო დაჩქარებულად განიხილავდა. ცვლილებები 2021 წლის პირველი ივნისიდან ამოქმედდება.

ახალი კანონპროექტის თანახმად, ადმინისტრაციულ სამართალდარღვევათა კოდექსში ცვლილებები შედის, რის შედეგადაც წვრილმანი ხულიგნობისა (166-ე მუხლი) და სამართალდამცველის მოთხოვნისადმი დაუმორჩილებლობისთვის (173-ე მუხლი) სანქციები იზრდება.

წვრილმან ხულიგნობაზე პირველი ადმინისტრაციული დარღვევის შემთხვევაში, სანქცია რჩება იგივე, ანუ 500-დან 1000 ლარამდე ჯარიმა ან 15 დღემდე პატიმრობა. განმეორებითი სამართალდარღვევის შემთხვევაში ჯარიმა იქნება 1 500-დან 2 000 ლარამდე ან 5-დან 15 დღემდე პატიმრობა.

რაც შეეხება სამართალდამცველის მოთხოვნისადმი დაუმორჩილებლობისთვის, აღნიშნული სამართალდარღვევა გამოიწვევს დაჯარიმებას 2 000-დან 3 000 ლარამდე ან პატიმრობას 15 დღემდე ვადით. განმეორების შემთხვევაში 3 500 ლარიდან 4 500-ლარამდე ჯარიმა ან 7-დან 15 დღემდე პატიმრობა.

ამასთან ცვლილება ეხება პატიმრობასაც. 247-ე მუხლი ჩამოყალიბდა შემდეგი რედაქციით:

1. ადმინისტრაციული დაკავების დროს, დაკავებული პირი პირველი შესაძლებლობისთანავე, მაგრამ არა უგვიანეს 24 საათისა წარედგინება სასამართლოს.
2. მტკიცებულების მოპოვების მიზნით, ამ მუხლის პირველი ნაწილით გათვალისწინებული ვადა შეიძლება ერთჯერადად გახანგრძლივდეს არაუმეტეს 24 საათით. ამ შემთხვევაში უფლებამოსილი ორგანოს შესაბამისი თანამშრომელი წერილობით ასაბუთებს ადმინისტრაციული დაკავების ვადის გახანგრძლივების მიზანშეწონილობას.
3. თუ დაკავებული პირი ამ მუხლის პირველი ან მეორე ნაწილით გათვალისწინებულ ვადაში არ წარედგინა სასამართლოს, იგი დაუყოვნებლივ უნდა გათავისუფლდეს.
4. დაკავებული პირი სასამართლოსთვის წარდგენამდე უფლებამოსილმა ორგანომ შეიძლება მოათავსოს დროებით მოთავსების იზოლატორში.