დეკანოზი თეიმურაზ თათარაშვილი მის მიმართ ფიზიკურ დაპირისპირებას ადასტურებს, თუმცა ამბობს, რომ ეს სასულიერო პირის მხრიდან არ მომხდარა.

6 მაისს ტაბულამ გაავრცელა ინფორმაცია, რომ ურბნელი მიტროპოლიტი იობის რეზიდენციაში სტუმრად მყოფ დეკანოზ თეიმურაზ თათარაშვილს, ამავე ეპარქიაში მყოფი სურამისა და ხაშურის ეპისკოპოსი სვიმეონ ცაკაშვილის მძღოლი ფიზიკურად გაუსწორდა. როგორც გამოცემამ წყაროზე დაყრდნობით წერს, დეკანოზისკენ გაიწია ეპისკოპოსმა სვიმეონმაც.

ტელეკომპანია TV პირველთან საუბრისას დეკანოზი თათარაშვილი ეს იყო შიდასაეკლესიო გაუგებრობა, რომელიც მღვდელმთავართან ერთად მოგვარდა.

"მე თვითონ გამოვხატე უდიერი განწყობა მღვდელმთავართან შეხვედრასთან დაკავშირებით, ვთქვი, რომ მასთან შეხვედრას, მერჩივნა, შევხვედროდი ქვეწარმავალს, ასეთი სიტყვები ვთქვი, რაც, რა თქმა უნდა, არ უნდა მეთქვა. ფიზიკური დაპირისპირება ერის ერთ-ერთმა ადამიანმა ჩაიდინა, რომელიც აფექტურ მდგომარეობაში იყო, მაგრამ ყველაფერი იქვე გაირკვა, როგორც შეშვენით ქრისტიანებს. იქვე მეც ვითხოვე პატიება და ყველაფერი დამშვიდებული სიტუაციით დამთავრდა. თავს შევიკავებ დეტალებისგან, უხერხულია ჩემთვისაც და, ალბათ, ყველასთვისაც, რომ ვილაპარაკოთ რა სახით მოხდა ე.წ. ფიზიკური ანგარიშსწორება, არა მგონია, ეს ვინმეს აინტერესებდეს", — ამბობს დეკანოზი.

მისივე თქმით, ის არავის დაუჩოქებია და შენდობის თხოვნის მიზნით მეტანია თვითონ გააკეთა:

"როდესაც შენდობას ვითხოვთ ეპისკოპოსისგან, ავტომატურად ხდება მეტანიის გაკეთება და ვითხოვე შენდობა აქეთ მე, ყველაფრის მიუხედავად".

აღნიშნულ შემთხვევასთან დაკავშირებით On.ge-მ სცადა ეპისკოპოს სვიმეონთან დაკავშირება, თუმცა ის ჩვენს ზარებს არ პასუხობს. მიტროპოლიტ იობთან დარეკვისას კი ყურმილი სხვა პირმა აიღო, რომელმაც თქვა, რომ არაფერი არ მომხდარა.