თბილისში, გრიგოლ ორბელიანის მოედნის, მშრალი ხიდისა და მიმდებარე ტერიტორიის სრული რეაბილიტაციისთვის 52 მილიონი ლარის დახარჯვა იგეგმება. რეაბილიტაციისთვის მომსახურების შეძენა გამარტივებული წესით იგეგმება. შესაბამისი მოთხოვნით ააიპ თბილისის განვითარების ფონდმა სახელმწიფო შესყიდვების სააგენტოს მიმართა.

რეაბილიტაციის პროცესში გათვალისწინებულია:

  • 20-ზე მეტ მისამართზე (22-ზე მეტი შენობა-ნაგებობა, მათ შორის 13 კულტურული მემკვიდრეობის უძრავი ძეგლი) განთავსებული ინდივიდუალური შენობა-ნაგებობების რეკონსტრუქცია-რეაბილიტაცია;
  • საინჟინრო-საკომუნიკაციო ქსელების რეკონსტრუქცია;
  • ქუჩების კეთილმოწყობა;
  • რეკრეაციული ზონების რეაბილიტაცია;
  • მიწისქვეშა ავტოსადგომის მშენებლობა.

თბილისის განვითარების ფონდში მიაჩნიათ, რომ განთავსებული შენობების, მჭიდრო განაშენიანებისა და მათი ხანდაზმულობიდან გამომდინარე, წინასწარ შეუძლებელია რეაბილიტაციის პროცესში სამუშაოების პროგნოზირება. სამუშაოების არაპროგნოზირების გამო კი, მიაჩნიათ, რომ მოსალოდნელია პროექტების და ფინანსური ნაწილის კორექტირება-შეთანხმება, რაც გამორიცხულია სატენდერო წესით შესყიდვის განხორციელების შემთხვევაში.

შესყიდვების სამსახურს გამარტივებული წესით შესყიდვებისთვის ნებართვის გასაცემად ვადა 28 თებერვლამდე აქვს.