ჯანდაცვის მინისტრის, ეკატერინე ტიკარაძის განცხადებით, საზოგადოებაში ვაქცინაციის პროცესთან მიმართებით სანდოობა იზრდება. მინისტრი აღნიშნავს, რომ 5 მაისს იყო რეკორდული მაჩვენებელი, როცა 3 600-ზე მეტმა ადამიანმა ვაქცინის კუთვნილი დოზა მიიღო.

"აღსანიშნავია, რომ საქართველოში ვაქცინაციის პროცესის მიმდინარეობა მნიშვნელოვნად არის გაუმჯობესებული. გუშინ გვქონდა რეკორდული მაჩვენებლი, 3 600-ზე მეტმა ადამიანმა მიიღო კუთვნილი ვაქცინის დოზა, რაც სასიხარულოა. ვაკვირდებით, რომ საზოგადოების მზაობა, მიმღებლობა და სანდოობა ვაქცინაციის პროცესთან მიმართებაში იზრდება, რაც იყო მოსალოდნელია", — აღნიშნავს მინისტრი.

საქართველოში კორონავირუსის წინააღმდეგ ვაქცინაცია 15 მარტს დაიწყო და გარკევული ჯგუფის პირებისთვის იყო ხელმისაწვდომი. 4 მაისს კი 18 წლის ზემოთ პირებისთვის ჩინური ვაქცინა სინოფარმი გახდა ხელმისაწვდომი, რომელსაც ჯერ ჯანმრთელობის მსოფლიო ორგანიზაციისგან ავტორიზაცია მიღებული არ აქვს.

WHO-ს ნებართვის მიღების შემთხვევაში, ჩინური Sinopharm იქნება პირველი ვაქცინა არადასავლური ქვეყნიდან, რომელმაც ჯანდაცვის მსოფლიო ორგანიზაციისგან მიიღო ნებართვა. ამ ეტაპზე კი, WHO-ს საგანგებო გამოყენების ნებართვა გაცემული აქვს ისეთი ვაქცინებისთვის, როგორიცაა Pfizer-BioNTech, AstraZeneca and Johnson & Johnson.