ნაციონალური მოძრაობის პოლიტსაბჭოს წევრი, ხატია დეკანოიძე აცხადებს, რომ პარტიის თავმჯდომარის, ნიკა მელიას გათავისუფლების შემდეგ, მათ უნდა მიიღონ მონაწილეობა საპარლამენტო საქმიანობაში. დეკანოიძე აზუსტებს, რომ ეს მხოლოდ მისი პირადი პოზიციაა და პარტიაში ამაზე უნდა იმსჯელონ.

"ამაზე ვითათბირებთ, რა თქმა უნდა, ყველა, მაგრამ, ჩემი უშუალო პოზიციაა, რომ მას შემდეგ, რაც ნიკა გათავისუფლება, ნაციონალურმა მოძრაობამ უნდა მიიღოს საპარლამენტო საქმიანობაში მონაწილეობა და რატომ, რაციონალურად გეტყვით: პირველ რიგში იმიტომ, რომ თუ ჩვენ ვთანხმდებით და ადგილობრივი თვითმმართველობის არჩევნებზე გავდივართ და ეს უნდა ვაქციოთ რეფერენდუმად — ჩვენ გვესმის ყველას, რომ ეს არ არის ის შედეგი ... პრინციპულობით, მე ვფიქრობ, უფრო მეტის მიღწევა შეიძლებოდა — მაშინ, შესაბამისად, ჩვენ უნდა ვიბრძოლოთ ყველა ფრონტზე ამისთვის.

ეს არის ჩემი პოზიცია, პირადი პოზიცია. რა თქმა უნდა, ნიკას გამოსვლის შემდეგ, ჩვენ გვექნება კონსულტაციები. პირველ რიგში, ძალიან მნიშვნელოვანია მისი პოზიცია", — განაცხადა დეკანოიძემ TV პირველის ეთერში.

ნაციონალურმა მოძრაობამ ევროპული საბჭოს პრეზიდენტის, შარლ მიშელის ინიციატივით შექმნილ დოკუმენტს, რომელიც, მათ შორის, ოპოზიციონერი დეპუტატების პარლამნეტში შესვლას გულისხმობდა ხელი არ მოაწერა. მათ თქვეს, რომ დოკუმენტს ხელს პარტიის ნიკა მელიას გათავისუფლებამდე არ მოაწერდნენ, თუმცა, აქამდე დაზუსტებით პარტიის არც ერთ წევრს არ უთქვამს, რომ მელიას გამოსვლის შემდეგ საპარლამენტო საქმიანობაში მონაწილეობას მიიღებდნენ.

აღსანიშნავია, რომ დოკუმენტს ინდივიდუალურად მოაწერა ხელი სალომე სამადაშვილმა. 30 აპრილს მან განაცხადა, რომ ოპოზიციამ პარლამენტის საქმიანობაში აქტიურ ჩართვაზე მელიას გათავისუფლებამდეც უნდა იმსჯელოს.

გაიგეთ მეტი: