ეკონომიკის მინისტრის, ნათია თურნავას განცხადებით, ის ტურისტული სივრცეები,სადაც დასაქმებულთა უდიდესი უმრავლესობა აიცრება, კოვიდუსაფრთხო სივრცეებად ჩაითვლება.

"შედეგად ის ორგანიზაციები, ის კომპანიები, სადაც დასაქმებული პერსონალის უდიდესი უმრავლესობა, რა თქმა უნდა, იმ წესების დაცვით, რასაც ჯანდაცვის სამინისტრო აწესებს, იქნება ვაქცინირებული, ჩაითვლება ე.წ. კოვიდუსაფრთხო სასტუმროებად, კოვიდუსაფრთხო რესტორნებად, კომპანიებად და ჩვენ ყველა საერთაშორისო პლატფორმაზე, ყველა ჩვენს ხელთ არსებული მარკეტინგული შესაძლებლობით გავუწევთ მათ პრომოუშენს, მთელი მსოფლიო შეიტყობს, რომ საქართველოში ესა თუ ის რესტორანი, სასტუმრო არის კოვიდუსაფრთხო", — ამბობს თურნავა.

მისივე თქმით, საკოორდინაციო საბჭომ გადაწყვიტა, რომ დაიწყოს ტურიზმის სფეროს წარმომადგენლების ნებაყოფლობითი ორგანიზებული ვაქცინაცია.

"გადავწყვიტეთ პრემიერმინისტრის დავალებით, რომ ტურისტული ინდუსტრია იქნება პრიორიტეტული ჯგუფი ვაქცინაციის კონტექსტში, რადგან ჩვენთვის ძალიან მნიშვნელოვანია ახლა, რომ მოვახდინოთ, რაც შეიძლება სწრაფად, ტურისტული ინდუსტრიის აღდგენა, მისი მარკეტინგული მხარდაჭერა საერთაშორისო პლატფორმაზე სრულიად მსოფლიომ რომ შეიტყოს, რომ ჩვენი ტურისტული ინდუსტრია არის კოვიდუსაფრთხო. ეს, რა თქმა, უნდა შესაძლებელი არის სწრაფი ვაქცინაციის გზით იმიტომ, რომ ვაქცინაცია არის ერთადერთი საშუალება, რომელიც ძალიან სწრაფად აღგვადგენინებს ეკონომიკას. აქედან გამომდინარე, ჩვენ და ჩვენი სამინისტროს სისტემაში შემავალი ტურიზმის ადმინისტრაცია იმუშავებენ სხვადასხვა ასოციაციასთან, ეს არის ტურისტული ასოციაციები, რესტორატორთა ასოციაცია, სასტუმროების ასოციაცია იმისთვის, რომ რაც შეიძლება სწრაფად შედგეს შესაბამისი სიები სხვადასხვა რესტორნის, სასტუმროს, ტუროპერატორი კომპანიის თანამშრომლების და მოხდება მათი ორგანიზებული, ნებაყოფლობითი, რასაკვირველია, მაგრამ ორგანიზებული ვაქცინაცია. ჯანდაცვის სამინისტრო ამაში შემდეგ დაგვეხმარება", — განაცხადა მინისტრმა.