სეისმოლოგი თეა გოდოლაძე ვაშლიჯვარში მეწყრული პროცესების მიმდინარეობაზე ამბობს, რომ მდგომარეობა არ შეცვლილა და აცხადებს, რომ მთლიანად ფერდს აქვს პრობლემა იმის გამო, რომ გრუნტის კვეთა არასწორად მოხდა.

"კიდევ ერთხელ ვუსვამთ ხაზს ფაქტს, რომ ეს არ არის წერტილოვანი პრობლემა, ნაპრალი სადაც იყო და ამოივსო. ეს არის მთლიანად ფერდის სტაბილურობის პრობლემა. მთლიანად ფერდი არის დინამიკაში მოსული და მთლიანად ფერდს აქვს პრობლემა იმის გამო, რომ მოხდა გრუნტის კვეთა არასწორად. იქ არის ჩაჭრილი, დაახლოებით, 20 მეტრის სიღრმე, რომელმაც რეალურად პრობლემა შექმნა და ეს არ არის პრობლემა, რომელიც დღეს ან ხვალ, ან ერთი ხელის მოსმით მოგვარდება. ეს არის პრობლემა, რომელიც თავს ნებისმიერ დროს შეგვახსენებს, სანამ თავად ბუნებრივი დასტაბილურება არ მოხდება", — თქვა გოდოლაძემ მედიაცენტრ მთავარში.

დედამიწის შემსწავლელი ინსტიტუტის ხელმძღვანელმა, ასევე, განაცხადა, რომ ეს იყო მეწყერსაშიში ფერდი და მასში ჩარევა პრობლემას ყოველთვის გამოიწვევს .

"ახლა ჩვენ ეს პრობლემა უფრო გავამწვავეთ და რეალურად დავაჩქარეთ პროცესები, რომლებიც ბუნებრივად ისედაც ხდებოდა. იმის თქმა, რომ ჩვენ მოვაგვარეთ პრობლემა და გავაჩერეთ მეწყერი ცოტა არასერიოზულია პროფესიული კუთხით", — აღნიშნა სეისმოლოგმა.

მისივე თქმით, ის რომ გადაწყვეტილების მიმღები პირი იყო, ნებისმიერ მშენებლობას ლისის ფერდზე აუცილებლად დააკონსერვებდა, რადგან "ეს ჯაჭვური რეაქციით გაგრძელდება, აუცილებლად სხვა პრობლემები შეიქმნება".

17 მარტს ფორუმზე გავრცელდა ფოტოები, სადაც ჩანს, რომ ვაშლიჯვრისა და ნუცუბიძის დამაკავშირებელი გზის ფერდობზე ნაპრალები გაჩნდა. ფოტოების გავრცელებამდე, დილით, თბილისის მერმა, კახა კალაძემ განაცხადა, რომ მაჭავარიანის ქუჩაზე მეწყრული პროცესების გააქტიურების გამო ტრანსპორტის მოძრაობა ორმხრივად შეიზღუდებოდა. კალაძეს არ უთქვამს ზუსტად როდის დაიწყო ეს პროცესები, თუმცა აღნიშნა, რომ დამეწყრილი უბნის შესწავლაში მერიის სამსახურებთან ერთად, შესაბამისი უწყებების სპეციალისტები უკვე ჩართულნი იყვნენ.

ამავე თემაზე: