სახელმწიფო უსაფრთხოების სამსახურში აცხადებენ, რომ ხურვალეთში პროვოკაციების მოწყობის მცდელობა საოკუპაციო ხაზს მიღმა იყო. უწყების საზოგადოებასთან ურთიერთობის სამსახურში On.ge-ს განუცხადეს, რომ ადგილზე სამოქალაქო პირები იყვნენ მისულნი, რომლებიც, სავარაუდოდ, ნასვამ მდგომარეობაში იყვნენ.

"პროვოკაციების მცდელობა იყო. სავარაუდოდ, ნასვამები იყვნენ. მყისიერად მოხდა ცხელი ხაზის გააქტიურება და ინციდენტი აღმოიფხვრა", — გვითხრეს სუს-ში.

ანტისაოკუპაციო მოძრაობის ლიდერმა, დავით ქაცარავამ გაავრცელა ინფორმაცია, რომ საქართველოს მიერ კონტროლირებად ტერიტორიაზე 4 სამოქალაქო ტანსაცმელში ჩაცმული პირი გადმოვიდა. მისივე თქმით, მომხდარზე პოლიციას რეაგირება ჰქონდა, რასაც ინციდენტი მოჰყვა.

განახლება:

მომხდარის განსხვავებულ ვერსია უთხრეს ხურვალეთელებმა შიდა ქართლის საინფორმაციო ცენტრს. ადგილობრივი მედიის ცნობით, 3 მამაკაცი ახლობლის საფლავზე მივიდა, შემდეგ კი, სოფელ ხურვალეთში მცხოვრებლებს ოსურად ეძახდნენ: "ამოდით, თითო ჭიქა დავლიოთო''.