თბილისში, პეკინის გამზირზე არასრულწლოვან ტრანსგენდერ გოგოს თავს დაესხნენ. აქტივისტი მადონა კიპაროიძე On.ge-ს უყვება, რომ მის მეგობარს ორი პირი დღეს დაესხა თავს.

როგორც მადონა ამბობს, მისმა მეგობარმა აფთიაქში შეიარა, რა დროსაც თავდამსხმელები მას გარეთ ელოდებოდნენ. აფთიაქის დატოვების შემდეგ, ტრანსგენდერ გოგოს ფიზიკური და სიტყვიერი შეურაცხყოფა მიაყენეს. ამასთან, დაუმტვრიეს ტელეფონი.

"სცემეს, მუხლის გადაატყავეს, თმები ამოგლეჯილი ჰქონდა ჩანთა დაუხიეს. საფულე გასტაცეს. ტელეფონი დაუმტვრიეს, რომ ვერც ვიდეო გადაეღო, ვერც პოლიციაში დაერეკა და ვერც სასწრაფოში, რომ დახმარება ეთხოვა. სხვისი მობილურით მაინც მოახერხა დარეკვა. მე რომ მივედი, უკვე სასწრაფო იყო მისული და ჭრილობებს უმუშავებდნენ", — აღნიშნავს მადონა კიპაროიძე.

აქტივისტის აცხადებს, არასრულწლოვანი დასაკითხად დიღმის მთავარ სამმართველოში გადაიყვანეს, სადაც მას იურისტი და სოცმუშაკი ჰყავს. მისივე ინფორმაციით, სათვალთვალო კამერებიდან ვიდეოკადრები ამოღებულია და თავდამსხმელების იდენტიფიცირება უკვე მოახდინეს.

შინაგან საქმეთა სამინისტროში On.ge-ს განუცხადეს, რომ გამოძიება სისხლის სამართლის 126-ე მუხლით დაიწყო, რაც ძალადობას გულისხმობს. უწყებაში საქმის სხვა დეტალებზე არ საუბრობენ.