საქართველოში ვაქცინაციის დაწყებიდან ერთ თვეში ჯამში 24 917 ადამიანი აიცრა. 15 აპრილის მონაცემებს დაავადებათა კონტროლის ცენტრი აქვეყნებს. მათივე ინფორმაციით, ბოლო 24 საათში კორონავირუსის ვაქცინა 1 424-მა ადამიანმა გაიკეთა.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო, ხოლო ვაქცინაციის პროცესში 65 წელს ზევით მოქალაქეები 25 მარტიდან ჩაერთნენ. ვაქცინაციის პროცესში 2 აპრილიდან ჩართნენ 55 წლის ზევით ასაკის მოქალაქეებიც.

Pfizer-ის ვაქცინის 29 250 დოზა საქართველოში 25 მარტს გამთენიისას ჩამოიტანეს. ხოლო ჩინური ვაქცინა სინოფარმი ქვეყანამ 3 აპრილს მიიღო. გარდა ამისა, 8 აპრილს ექსპერტების საბჭომ სამინისტროს და დაავადებათა კონტროლის ცენტრის თანამშრომლებთან ერთად მიიღო გადაწყვეტილება, რომ AstraZeneca-ს ვაქცინით ვაქცინაციის პროგრამა მხოლოდ 55 წლის ზემოთ პირებისთვის გაგრძელდება.