რუსთავი 2-ის გენერალური დირექტორი, პაატა სალია ამბობს, რომ გადაცემა პროფილი არხის მენეჯმენტის გადაწყვეტილებით არ მომხდარა. გარდა ამისა, სალია თავის განცხადებაში აღნიშნავს, რომ გადაცემის ავტორი, მაია ასათიანი თანამშრომლების მიმართ "დაუმსახურებელ და შეურაცხმყოფელ" განცხადებას აკეთებს.

"პროფილის დახურვა არ მომხდარა არხის მენეჯმენტის ინიციატივით, ეს გადაწყვეტილება გადაცემის ავტორმა, მაია ასათიანმა, გუნდთან ერთად, თავად მიიღო, მას შემდეგ, რაც ახალ საეთერო ბადეში შეჩერდა, ამავე გუნდის მიერ მომზადებული გადაცემა შორენას ეფექტი.

მაია ასათიანს ჰქონდა სრული გარანტია, რომ მიუხედევად არხზე მიმდინარე ცვლილებებისა, გადაცემა პროფილის შემოქმედებითი ჯგუფი ავტორთან ერთად, ჩვეულ რეჟიმში განაგრძობდა მუშაობას", — აღნიშნულია განცხადებაში.

მაია ასათიანი რუსთავი 2-ს ტოვებს. აღნიშნული პროფილის წამყვანმა გადაცემის ახალ პრომო ვიდეოში დაადასტურა.

"დღეს მე აქ, ამ არხზე ჩემს 20-წლიან ისტორიას ვასრულებ. ბოლო გავდივარ, იმიტომ რომ აქ იმ სიმართლეს, წლების წინ მთელი საქართველოს მთავარი იმედი რომ იყო, ვეღარ ვხედავ", — თქვა მან.

ჯერ კიდევ 5 მარტს ცნობილი გახდა, რომ პანდემიის გამო გამოწვეული ეკონომიკური სირთულისა და არხის რეიტინგის კლების გამო რუსთავი 2-ში სტრუქტურული რეორგანიზაცია გამოცხადდა. არხზე დაბრუნდნენ დემნა ჯაფარიძე და გიორგი ხაბურზანია, ხოლო რუსთავი 2-მა Prime Time-თან ერთად ჰოლდინგი ჩამოაყალიბა.