აჭარის სოფელ ინწკირვეთის სკოლის მასწავლებელი, თამუნა ლაბაძე ცდილობს, რომ საკლასო ოთახში დაბრუნებული მოსწავლეებისთვის ყოველი დღე საინტერესო და სახალისო იყოს. სწორედ ერთ-ერთი ასეთი შემთხვევა იყო მარტის მიწურულს, როცა გაზაფხულდა, მაგრამ არე-მარე თეთრმა ფიფქებმა დაფარა. თამუნა დაწყებითი კლასის მოსწავლეებს ეზოში გაუძღვა და მათთან ერთად თოვლში Jerusalema-ს მხიარული ჰანგების თანხლებით იცეკვა.

"მარტია, თოვს, მაგრამ გულში მაინც დარია", — დაწერა მასწავლებელმა ფეისბუქზე გამოქვეყნებული ვიდეოს აღწერაში.

ვიდეოში პატარა მოსწავლეები მასწავლებელს აკვირდებიან, სიხარულით იმეორებენ მის მოძრაობებს და მუსიკის რიტმს ყვებიან.

"ბუნებრივია პირბადის გარეშე სკოლის შენობაში ვერ ვიცეკვებდით, ამიტომ ამინდის მიუხედავად სკოლის ეზოში ვიცეკვეთ", — ამბობს მასწავლებელი. ასე რომ, კადრები, რომლებიც აუცილებლად გამოგიკეთებთ გუნებას, სკოლის ეზოშია გადაღებული.

"ჩემთვის მოსწავლეთა ღიმილი ყველაზე დიდი ჯილდოა", — გვეუბნება თამუნა ლაბაძე. ის სოფელ ინწკირვეთის საჯარო სკოლაში პირველი ოქტომბრიდან ასწავლის.

თამუნა ონლაინ სწავლების დროს უამრავ პლატფორმას იყენებდა, რომ განათლების მიღების პროცესი პატარებისთვის საინტერესო ყოფილიყო, თუმცა, პირველი თებერვლიდან საკლასო ოთახებში დაბრუნებას მოსწავლეებთან ერთად მოუთმენლად ელოდა. სკოლაში დაბრუნების შემდეგ მოსწავლეებს კიდევ უფრო დაუმეგობრდა:

"პანდემიიდან გამომდინარე მუდმივად მიწევდა პირბადის ტარება, მოსწავლეებმა მთხოვეს ერთ დღეს პირბადის გარეშე დავნახებოდი. უცებ მოვიფიქრე მესწავლებინა მათთვის მარტივი მოძრაობები და თანამედროვე მელოდიაზე დაგვედგა ფლეშმობი. უცებ აითვისეს და ეს დღეც შედგა".

Jerusalema სამხრეთ-აფრიკელი მუსიკოსის, Master KG-ის ცნობილი სიმღერაა, რომელიც 2020 წელს გამოვიდა და ქვეყნის საამაყო მუსიკალურ ნამუშევრებს შორის შევიდა. გასული წლის სექტემბერში, სამხრეთ აფრიკის რესპუბლიკის პრეზიდენტმა, სიმილ რამაფოსამ მოქალაქეებს მოუწოდა, რომ Jerusalema-ს ცეკვის გამოწვევაში ჩართულიყვნენ და მსოფლიოსთვის სამხრეთ აფრიკის მშვენიერება ახალი კუთხით ეჩვენებინათ. სიმღერა განსაკუთრებით პოპულარული მას შემდეგ გახდა, რაც გამოწვევაში Masaka Kids Africana-ს პატარა მოცეკვავეები ჩაერთვნენ.