დეკანოზ გიორგი მამალაძის ადვოკატი, გიორგი ფანცულაია, რომელიც ინფორმაციას მედიას ვერ აწვდის, რადგან პროკურატურამ გაუთქმელობის ხელწერილი დააწერინა, უწყებისგან ითხოვს, რომ საჯაროდ გამოთქმულ არგუმენტირებულ ბრალდებებზე მაინც მიეცეს პასუხის გაცემის საშუალება.

რუსთავი 2-თან საუბრისას, მან განაცხადა, რომ პროკურატურის ყველა არგუმენტთან დაკავშირებით განსხვავებული პოზიცია აქვს:

"ცუდია ის, რომ, პროკურატურის მიერ გვესმის უკვე გარკვეული საქმის მასალებზე თავიანთი შინაარსობრივი არგუმენტები და ჩვენ ამაზე არ გვაქვს ჩვენი პასუხის გაცემის უფლება. თითქმის ყველაფერში ჩვენი პოზიცია განსხვავდება ბრალდების პოზიციისგან და შესაბამისად, საზოგადოებამ რომ იცოდეს ორივე მხარის პოზიცია, ეს იქნებოდა ნამდვილად უფრო ნეიტრალური. გუშინ თხოვნით მივმართე პროკურატურას და დღესაც მივმართავ, რომ იქნებ იმ არგუმენტებზე მაინც მოგვეცეს პასუხის გაცემის უფლება, რასაც საჯაროდ გვიყენებენ. მათ მიერ გაჟღერებულ თითქმის ყველა არგუმენტთან ჩვენ ვართ წინააღმდეგობაში".

რაც შეეხება რუსთავი 2-ის მიერ გავრცელებული წერილის ავთენტურობას, ადვოკატის თქმით, თავად დეკანოზი მამალაძე მას ჯერ არ გაცნობია, ამიტომ მას ვერ დაადასტურებს, თუმცა ამბობს, რომ 2015 წლის დეკემბრიდან მსგავსი შინაარსის წერილები ჰქონდა დაწერილი, რომლებიც სხვადასხვა მხარეების მხრიდან სინოდის სხდომაზე იბლოკებოდა.