თბილისის მერიის პრესსამსახურის ინფორმაციით, ნაციონალური მოძრაობის აქტივისტების ნაწილი და პარტიასთან დაკავშირებული არასამთავრობო ორგანიზაციის წარმომადგენლები სიტუაციის დაძაბვასა და შენობაში შესვლას ცდილობენ. უწყების პრესსამსახურმა ინფორმაცია მერიის შენობასთან მიმდინარე აქციის გამო გააკეთა.

"გვინდა ხაზგასმით აღვნიშნოთ, რომ საკითხს, რომლითაც ნაციონალური მოძრაობის წევრები აჟიოტაჟის შექმნას და საზოგადოების შეცდომაში შეყვანას ცდილობენ, არაერთხელ გაეცა პასუხი ღიად და თემასთან დაკავშირებით ყველა მედიასაშუალებას მიეწოდა შესაბამისი ინფორმაცია. თბილისის მერია არ გასცდენია კანონიერების ფარგლებს და იმ შემთხვევაში, თუ არსებობს დამატებითი კითხვები კონკრეტული პირების მხრიდან, მათ შეუძლიათ მიმართონ სასამართლოს," - აღნიშნულია უწყების მიერ გავრცელებულ განცხადებაში.

პრესსამსახურის განმარტებით, აქციის მონაწილეების შენობაში შესვლა ხელს შეუშლის მერიის თანამშრომლების საქმიანობას და ადმინისტრაციული ორგანოს გამართულ ფუნქციონირებას.

თბილისის მერიასთან ტელეკომპანია რუსთავი 2-ის მხარდასაჭერია აქცია მიმდინარეობს. აქციაზე ისმის შეურაცხმყოფელი სიტყვები. თბილისის მერიის უსაფრთხოების სამსახურისა და საპატრულო პოლიციის თანამშრომლები არ უშვებენ აქციის მონაწილეებს მერიის შენობაში. შსს-მ აქციის 13 მონაწილე დააკავა.