თბილისის მერის, კახა კალაძის განცხადებით, ელექტრონული მუსიკის სფეროში დასაქმებულებს მუნიციპალიტეტი 2 მილიონი ლარის ოდენობით დაეხმარება. კალაძის თქმით, ფინანსური დახმარების პაკეტით, პირველ რიგში, მუსიკოსები, არტისტები და ტექნიკური პერსონალი ისარგებლებს.

"ღამის ეკონომიკის პროექტის ფარგლებში სექტორში ჩართულ ადამიანებთან გვქონდა კომუნიკაცია და მივიღეთ გადაწტვეტილება, რომ დახმარების პაკეტი მათაც შევთავაზოთ, რომელიც თანხობრივად 2 მილიონი ლარი იქნება. აღნიშნული დახმარების პაკეტით ამ მიმართულებით დასაქმებული მინიმუმ 500 შემოქმედი ისარგებლებს", — განაცხადა კალაძემ თბილისის მერიის სხდომაზე.

მისივე თქმით, მუსიკის სივრცეებისთვის მოხდება საიჯარო თანხების სრულად ან ნაწილობრივ მხარდაჭერა. ის, ასევე, ამბობს, რომ სფეროში ჩართული იურიდიული პირებისთვის განსაზღვრული კრიტერიუმების საფუძველზე დადგენილი კომუნალური გადასახადების მხარდაჭერა იქნება.

"ასევე, ეპიდემიოლოგიური ვითარების გათვალისწინებით დაიწყება ზაფხულის პერიოდში უსაფრთხო აღდგენის შესაბამისი სამუშაოები", — თქვა კალაძემ.

მან, აგრეთვე, აღნიშნა, რომ ელექტრონული მუსიკის სფერომ დედაქალაქს სახელი მსოფლიოს მასშტაბით გაუთქვა და უამრავი ტურისტები მოიზიდა.