ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, ჟოზეფ ბორელმა საქართველოში შექმნილ პოლიტიკურ ვითარებასთან დაკავშირებული განხილვის შეჯამებისას იმედი გამოთქვა, რომ ევროპული საბჭოს პრეზიდენტის, შარლ მიშელის ინიციატივით წამოწყებული მედიაცია შედეგს გამოიღებს.

"ჩვენ ძალიან ვეხმარებით საქართველოს. ჩვენ საქართველოში ყველაზე დიდი დონორი ვართ. ასევე, მნიშვნელოვან მხარდაჭერას ვუჩენთ საქართველოს კორონავირუსის პანდემიასთან დაკავშირებით. ვიმედოვნებთ, რომ მედიაციის მცდელობა, რომელიც პრეზიდენტ შარლ მიშელმა დაიწყო, პრობლემების მოგვარებისკენ მიგვიყვანს, რაც პოლიტიკური შეთანხმების მიღწევას გულისხმობს.

ძირითადი განსახილველი საკითხებია — კანონის უზენაესობა / მართლმსაჯულების რეფორმა, ძალაუფლების გადანაწილება პარლამენტში და ურთულესი შესაძლო ვადამდელი არჩევნების ან პლებისციტის საკითხი. იმედი მაქვს, რომ დიალოგის გზით საქართველოში პოლიტიკური კრიზისი განიმუხტება", — განაცხადა ბორელმა ევროპარლამენტში დასკვნითი სიტყვით გამოსვლისას.

ევროპარლამენტის საგაზაფხულო სესიის ფარგლებში საქართველოში არსებულ პოლიტიკურ ვითარებასთან დაკავშირებით დებატები დღეს, 9 მარტს გაიმართა. დებატების საკითხი საგაზაფხულო სესიის დღის წესრიგში ევროპელი დეპუტატების ინიციატივით შევიდა. საქართველოს შესახებ მომხსენებელი ევროკავშირის საგარეო ურთიერთობებისა და უსაფრთხოების საკითხებში ევროკავშირის უმაღლესი წარმომადგენელი და ევროკომისიის ვიცე-პრეზიდენტი, ჯოზეფ ბორელი იყო.

ევროპარლამენტის პლენარულ სესიას ესწრებოდა საქართველოს საპარლამენტო დელაგაციაც, რომელსაც საქართველოს პარლამენტის ევროპასთან ინტეგრაციის კომიტეტის თავმჯდომარე, მაკა ბოჭორიშვილი ხელმძღვანელობდა.

ევროპარლამენტის პლენარული სესია 8 მარტს გაიხსნა. მუშაობას იგი 11 მარტს დაასრულებს.