საპატრიარქოში აღნიშნავენ, რომ გუშინ, 8 მარტს ჭყონდიდის ეპარქიასთან შენიშნეს, არამხოლოდ მორწმუნე, არამედ პოლიტიკურად ანგაჟირებული პირებიც. მათი თქმით, მომხდარი დაგეგმილი პროვოკაცია იყო.

"ეს კადრებში ძალიან კარგად ჩანს და ამის მტკიცებულებებს ჩვენ წარმოგიდგენთ, რომ იქ არ იყვნენ მხოლოდ ეკლესიის ინტერესებით დაკავებული ადამიანები. იქ სხვა საზოგადოებრივი ჯგუფებიც იმყოფებოდნენ".

დამზუსტებელ კითხვაზე, თუ რომელ პოლიტიკოსებს გულისხმობენ, საპატრიარქოში პასუხობენ, რომ ეკლესიური ადამიანი არ შეიჭრება რეზიდენციაში და ეს ბადებს საფუძვლიან ეჭვს, რომ "დესტრუქციული ქმედებების დროს, ასეთ ადამიანებს აგულიანებენ ის ადამიანები, რომლებიც პოლიტიკასთან არის შეხებაში".

კითხვაზე, გულისხმობენ თუ არა მეუფე პეტრეს, უპასუხეს: "მე განცხადებაში გარკვევით აღვნიშნე და ვფიქრობ, რომ სხვა კომენტარებს ეს არ საჭიროებს. მინიშნებები გაკეთებულია, ყველა თავის თავს ამოიცნობს ამ განცხადებაში".

საპატრიარქომ მოუწოდა ყველას, რომ შეუნარჩუნონ სიმშვიდე, რადგან ვითარების დაძაბვა "მოწინააღმდეგე ძალის" მიზანია. ამასთანავე საპატრიარქოში ფიქრობენ, რომ მრევლის ნაწილს მხოლოდ ცალმხრივად მიწოდებული ინფორმაცია აქვს, ამიტომ ბრიფინგზე მოვლენების განვითარებას განიხილეს.

მანამდე მეუფე სტეფანემ აღნიშნა, რომ ადგილზე იმყოფებოდნენ ნაციონალური მოძრაობის წარმომადგენლები და საკრებულოს ყოფილი თავმჯდომარე ხელმძღვანელობდა მიტინგს.

8 მარტს ჭყონდიდის ეპარქიაში მეორე სართულის აივანზე მოაჯირის ჩანგრევის შედეგად 10-მდე ადამიანი გადავარდა. არიან დაშავებულები, მათ შორის, ჟურნალისტებიც. დაშავებულებს სიცოცხლისთვის შეუთავსებელი დაზიანებები არ აქვთ.

გარდა ამისა, ეპარქიაში ერთ-ერთი სასულიერო პირი მთავარი არხის ჟურნალისტსა და ოპერატორს ფიზიკურად შეეხო.

ჭყონდიდის ყოფილი მიტროპოლიტი მეუფე პეტრე ცაავა მარტვილის ეპარქიაში განვითარებულ მოვლენებზე პასუხისმგებლობას მეუფე სტეფანეს აკისრებს. როგორც ის აცხადებს, "შენს რეზიდენციაში, როცა შენ ხარ მასპინძელი, ადამიანები 4-5 მეტრის სიმაღლიდან რომ გადაცვივდებიან, მთელი პასუხიმგებლობა შენზეა". თუმცა, მიტროპოლიტმა სტეფანემ დაშავებულების შესახებ დასმული კითხვების პასუხად "გალობა" დაიწყო.

ეპარქიაში განვითარებულ მოვლენებზე შსს-მს გამოძიება დაიწყო. როგორც უწყებაში On.ge-ს განუცხადეს, გამოძიება სისხლის სამართლის კოდექსის 124-ე მუხლით მიმდინარეობს, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.