ჭყონდიდის ეპარქიაში განვითარებულ მოვლენებს საპატრიარქო დაგეგმილ პროვოკაციად აფასებს და აცხადებს, რომ "წაქეზებული ადამიანები" და ჟურნალისტები საეპისკოპოსო რეზიდენციაში "ძალმომრეობით შეიჭრნენ", რა დროსაც მოაჯირი გატყდა. გავრცელებულ კადრებში კი ჩანს, რომ მოაჯირი მას შემდეგ გატყდა, რაც კარგი გაიღო, ჟურნალისტები და ოპერატორები კი ამ დროს პროფესიულ მოვალეობას ასრულებდნენ და პროცესებს იღებდნენ.

"ჭყონდიდის ეპარქიაში მომხდარი ეს ამბავი იყო დაგეგმილი პროვოკაცია, მიმართული ამ ეპარქიის და საერთოდ საქართველოს ეკლესიის წინააღმდეგ. გუშინდელმა კადრებმა დაგვანახა, რომ აქციაში მონაწილეთა ქცევა, საერთოდ არ შეესაბამება მორწმუნეთა საქციელს. დაგვანახა ისიც, რომ ვინც ამ პროცესებს გეგმავს, ყოველგვარ უღირსებაზეა წამსვლელი. მათთვის კარგა ხანია, აგრესია, სიცრუე, ცილისწამება ჩვეულებრივ მოვლენად იქცა. არ აქვთ ღვთის შიში და რწმენა, ახლა კი უკვე ძალმომრეობასაც აღარ ერიდებიან", — განაცხადეს საპატრიარქოსთან გამართულ ბრიფინგზე.

გარდა ამისა, საპატრიარქოში აღნიშნავენ, რომ ეპარქიასთან შენიშნეს, არამხოლოდ მორწმუნე, არამედ პოლიტიკურად ანგაჟირებული პირებიც.

"ეს კადრებში ძალიან კარგად ჩანს და ამის მტკიცებულებებს ჩვენ წარმოგიდგენთ, რომ იქ არ იყვნენ მხოლოდ ეკლესიის ინტერესებით დაკავებული ადამიანები. იქ სხვა საზოგადოებრივი ჯგუფებიც იმყოფებოდნენ".

კითხვაზე, გულისხმობენ თუ არა მეუფე პეტრეს, უპასუხეს: "მე განცხადებაში გარკვევით აღვნიშნე და ვფიქრობ, რომ სხვა კომენტარებს ეს არ საჭიროებს. მინიშნებები გაკეთებულია, ყველა თავის თავს ამოიცნობს ამ განცხადებაში".

საპატრიარქომ მოუწოდა ყველას, რომ შეინარჩუნონ სიმშვიდე, რადგან ვითარების დაძაბვა "მოწინააღმდეგე ძალის" მიზანია. ამასთანავე საპატრიარქოში ფიქრობენ, რომ მრევლის ნაწილს მხოლოდ ცალმხრივად მიწოდებული ინფორმაცია აქვს, ამიტომ ბრიფინგზე მოვლენების განვითარებას განიხილეს.

8 მარტს ჭყონდიდის ეპარქიაში მეორე სართულის აივანზე მოაჯირის ჩანგრევის შედეგად 10-მდე ადამიანი გადავარდა. არიან დაშავებულები, მათ შორის, ჟურნალისტებიც. დაშავებულებს სიცოცხლისთვის შეუთავსებელი დაზიანებები არ აქვთ.

გარდა ამისა, ეპარქიაში ერთ-ერთი სასულიერო პირი მთავარი არხის ჟურნალისტსა და ოპერატორს ფიზიკურად შეეხო.

ჭყონდიდის ყოფილი მიტროპოლიტი მეუფე პეტრე ცაავა მარტვილის ეპარქიაში განვითარებულ მოვლენებზე პასუხისმგებლობას მეუფე სტეფანეს აკისრებს. როგორც ის აცხადებს, "შენს რეზიდენციაში, როცა შენ ხარ მასპინძელი, ადამიანები 4-5 მეტრის სიმაღლიდან რომ გადაცვივდებიან, მთელი პასუხიმგებლობა შენზეა". თუმცა, მიტროპოლიტმა სტეფანემ დაშავებულების შესახებ დასმული კითხვების პასუხად "გალობა" დაიწყო.

ეპარქიაში განვითარებულ მოვლენებზე შსს-მს გამოძიება დაიწყო. როგორც უწყებაში On.ge-ს განუცხადეს, გამოძიება სისხლის სამართლის კოდექსის 124-ე მუხლით მიმდინარეობს, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.