სტრატეგია აღმაშენებლის ლიდერი, გიორგი ვაშაძე ეხმაურება, პრემიერმინისტრობის კანდიდატის, ირაკლი ღარიბაშვილის განცხადებას წესრიგის დამყარებასთან დაკავშირებით. ვაშაძე ამბობს, რომ ქართულ ოცნებას და თავად ღარიბაშვილს მოუწევს სერიოზული გამოცდის ჩაბარება — სახეს შეინარჩუნებს და მოუსმენს ოპოზიციას, თუ იქნება აგრესიული.

"პრემიერი [გიორგი გახარია], რომელსაც მხარი დაუჭირეს, ივანიშვილთან ერთად, გადადგა და თქვა, რომ ეს არის ძალადობა და არ შეიძლება მოხდეს. ამ ძალადობას თუ ისინი გააგრძელებენ, ვერანაირი გამართლება ვეღარ ექნება.

ამიტომ, ვფიქრობ, რომ სერიოზული გამოცდა უნდა ჩააბაროს ქართულმა ოცნებამ და პირადად ღარიბაშვილმაც — წესრიგის დამყარება მისთვის იქნება მოსმენა, სახის შენარჩუნება და შეთანხმებისკენ სვლა, თუ ეს იქნება პირდაპირ ძალადობრივ აგრესიაზე წასვლა. დღეს რა განცხადებებიც არის ქვეყნის შიგნითაც და ქვეყნის გარეთაც, ძალადობა, ძალიან სწრაფად დაამთავრეს ქართულ ოცნებას", — განაცხადა გიორგი ვაშაძემ მთავარი არხის ეთერში.

ირაკლი ღარიბაშვილმა პრემიერმინისტრობის კანდიდატად წარდგენის შემდეგ განაცხადა, რომ ძალიან მალე აღადგენს წესრიგს.

ერთიანი ნაციონალური მოძრაობის თავმჯდომარის, ნიკა მელიასთვის აღკვეთის ღონისძიების სახით პატიმრობის შეფარდებიდან რამდნიმე საათში, გიორგი გახარიამ პრემიერმინისტრის პოსტი დატოვა. მისი თქმით, სასამართლოს გადაწყვეტილების აღსრულება მხოლოდ მაშინ უნდა მოხდეს, თუ დაძაბულობისა და ესკალაციისგან დაზღვეულები ვიქნებით. ამ საკითხთან დაკავშირებით გუნდში აზრთა სხვადასხვაობის გამო კი მან გადადგომა გადაწყვიტა.

გახარიას გადადგომიდან რამდენიმე წუთში, შსს-მ მელიას საქმეზე დაგეგმილი ღონისძიება "დროებით" გადადო.

გაიგეთ მეტი: