ქობულეთში, 14 წლის ბავშვთან სექსუალური კავშირის დამყარებაში ბრალდებულ კაცს პროკურატურამ ბრალი თვითმკვლელობამდე მიყვანის მუხლითაც წარუდგინა. უწყების ინფორმაციით, კაცმა იცოდა, რომ გოგო 16 წლის არ იყო და მიუხედავად ამისა, ორჯერ, მოტყუებით დაამყარა მასთან სექსუალური კავშირი.

"საქართველოს შინაგან საქმეთა სამინისტროს მიერ ჩატარებული გამოძიებით დადგინდა, რომ ნ.ტ.-მ მიუხედავად იმისა, რომ იცოდა ნ.ც. თექვსმეტი წლის ასაკს მიუღწეველი იყო, 2020 წლის ივნისში და დეკემბერში, მოტყუებით, იმ პირობით, რომ მომავალში ცოლად შეირთავდა, სექსუალური კავშირი დაამყარა, რის შემდეგაც მასთან გაწყვიტა კონტაქტი. მოგვიანებით კი გოგონას განუცხადა, რომ მასზე დაქორწინებას არ აპირებდა. აღნიშნულით დაამცირა მისი ღირსება. ნ.ც.-მ, 2021 წლის 09 თებერვალს თვითმკვლელობა ჩაიდინა", — აცხადებენ პროკურატურაში.

დაკავებულს ბრალი სისხლის სამართლის კოდექსის ორი მუხლით აქვს წარდგენილი: სრულწლოვანის სექსუალური ხასიათის შეღწევა დამნაშავისთვის წინასწარი შეცნობით თექვსმეტი წლის ასაკს მიუღწეველის სხეულში (ორი ეპიზოდი) და თვითმკვლელობამდე მიყვანა. ეს მუხლები, ბრალის დამტკიცების შემთხვევაში, სასჯელის სახედ და ზომად 7-დან 9 წლამდე თავისუფლების აღკვეთას ითვალისწინებს.

პროკურატურაში ამბობენ, რომ აღკვეთის ღონისძიების სახით პატიმრობის გამოყენების შუამდგომლობით ბათუმის საქალაქო სასამართლოს უკვე მიმართა.

მათივე განცხადებით, სისხლის სამართლის საქმეზე გამოძიება გრძელდება გარდაცვლილი ბავშვის მიმართ შესაძლო სხვა ძალადობის ფაქტებზეც.