ქართული ოცნების ოფისთან მიმდინარე საპროტესტო აქციაზე 2 პირი დააკავეს. შინაგან საქმეთა სამინისტროს განცხადებით, მათ სამართალდამცავებისადმი დაუმორჩილებლობას ედავებიან.

აქტივისტები ამბობენ, რომ პოლიციამ მათ წარწერების გაკეთების უფლება არ მისცა, რასაც დაპირისპირება მოყვა. ერთ-ერთი აქტივისტის თქმით, პოლიციელმა მას ხელი დაარტყა, მეორე კი ამბობს, რომ დაკავების მცდელობისას შეუძლოდ გახდა და ის თანამებრძოლებმა გამოსტაცეს პოლიციელებს.

დღეს, 11 თებერვალს ე.წ. კომენდანტის საათის დროს პარლამენტის შენობიდან ქართული ოცნების ოფისისკენ მსვლელობა გაიმართა. აქციის მონაწილეები "სისტემის უმოქმედობას" აპროტესტებენ და აცხადებენ, რომ ქობულეთში გარდაცვლილი 14 წლის ბავშვის საქმეზე ყველა შესაბამისი პირის პასუხისმგებლობა უნდა დადგეს, მათ შორის, შს მინისტრი, ვახტანგ გომელაური უნდა გადადგეს.

დღეს შინაგან საქმეთა სამინისტრომ გაავრცელა ინფორმაცია, რომ ქობულეთში 24 წლის კაცი დააკავეს, რომელმაც 16 წლამდე ბავშვთან სქესობრივი კავშირი დაამყარა. არსებული ინფორმაციით, ბავშვი 14 წლის გოგოა, რომელმაც გუშინ თავი მოიკლა. აღსანიშნავია, რომ როცა მედიაში ბავშვის თვითმკვლელობის შესახებ ინფორმაცია გავრცელდა, შსს სავარაუდო სექსუალურ ძალადობას არ ადასტურებდა. დღეს გავრცელებულ განცხადებაში კი, სადაც მოძალადის დაკავებაზეა საუბარი, ასევე არაფერია ნათქვამი თვითმკვლელობაზე.