სახელმწიფო უსაფრთხოების სამსახურში აცხადებენ, რომ საოკუპაციო რეჟიმის მხრიდან უკანონო დაკავებებით გამოწვეული ნებისმიერი აქცია, რომელიც საფრთხეს შეუქმნის საქართველოს კრიტიკული ინფრასტრუქტურისა და საოკუპაციო ხაზზე წარმოდგენილ საპოლიციო დანაყოფების ფუნქციონირებას, საოკუპაციო რეჟიმის მიზნებსა და ამოცანებში ჯდება.

უწყებაში აღნიშნავენ, რომ უკანონო დაკავებების ფაქტზე საზოგადოების პროტესტი ლეგიტიმურია, თუმცა, მათვე თქმით, პროტესტის დროს საზოგადოებრივი და სახელმწიფო უსაფრთხოების ცალკეული მნიშვნელოვანი საკითხები გათვალისწინებული უნდა იყოს.

"საოკუპაციო რეჟიმის მხრიდან უკანონო დაკავებებით გამოწვეული ნებისმიერი აქცია, რომელიც საფრთხეს შეუქმნის საქართველოს კრიტიკული ინფრასტრუქტურისა და საოკუპაციო ხაზზე წარმოდგენილ საპოლიციო დანაყოფების ფუნქციონირებას, საოკუპაციო რეჟიმის მიზნებსა და ამოცანებში სრულად ჯდება".

უკანონო დაკავებების ფაქტზე საზოგადოების პროტესტი ლეგიტიმურია. სახელმწიფო უსაფრთხოების სამსახური იზიარებს აღნიშნულ პროტესტს. თუმცა პროტესტის დროს უნდა იყოს გათვალისწინებული საზოგადოებრივი და სახელმწიფო უსაფრთხოების ცალკეული მნიშვნელოვანი საკითხები. ცალსახად ვაფიქსირებთ, რომ საოკუპაციო ხაზის მიმდებარედ ხალხმრავალი საპროტესტო აქციების გამართვამ, შესაძლოა, მნიშვნელოვნად დააზიანოს ადგილზე არსებული უსაფრთხოების გარემო. მეტიც აღნიშულ პროცესში, შესაძლოა, პირდაპირი საფრთხე დაემუქროს ადგილზე წარმოდგენილ სამოქალაქო პირებსა და პოლიციას", — აცხადებენ უწყებაში.

სუს-ის განცხადებით, უსაფრთხოების საკითხების, განსაკუთრებით კი, უკანონო დაკავებებისა და ე.წ. ბორდერიზაციის პოლიტიზება კრიტიკულად აზიანებს პროცესს და აღნიშნულის განმახორიცელებელთა არაპროფესიონალიზმზე მიუთითებს.

საქართველოს მოქალაქეები და სამოქალაქო აქტივისტები რუსი ოკუპანტების მიერ საქართველოს მოქალაქეების დაკავებას ხშირად აპროტესტებენ. აქციები გაიმართა თბილისსა და სოფელ ქვემო ჭალაში უკანონო პატიმრობა მისჯილი ზაზა გახელაძის ოჯახის მხარდასაჭერად, სადაც მთავრობას ქმედითი ნაბიჯების გადადგმისკენ მოუწოდეს.

აქცია გაიმართა გუშინ, 10 ნოემბერს ენგურის ხიდთანაც. მოქალაქეებმა აფხაზური დროშის დაწვისთვის დაპატიმრებული ირაკლი ბებუას მხარდაჭერა გამოუცხადეს.