ქართული ოოცნების აღმასრულებელი მდივნის, ირაკლი კობახიძის განცხადებით, ზოგიერთი ოპოზიციონერი დეპუტატი პარლამენტის საფინასნო დეპარტამენტს ხელფასების ჩარიცხვის მოთხოვნით მიმართავს. მისი თქმით, ეს მიუთითებს იმაზე, რომ დეპუტატებს სურთ პარლამენტში შესვლა.

"ზოგიერთმა დეპუტატმა შემოიტანა განცხადება ანაზღაურებასთან დაკავშირებით, ოპოზიციონერმა კონკრეტულმა დეპუტატებმა. მე მაგიტომ გეუბნებით, რომ დეპუტატებს აქვთ სურვილი [პარლამენტში] შემოსვლის. ერთადერთი არის შანტაჟი და ბულინგი და ბუნებრივია საბოლოო ჯამში ამ შანტაჟისა და ბულინგისგანაც განთავისუფლდება.

იმ დეპუტატებს, რომლებიც იყვნენ წინა მოწვევაშიც, ავტომატურად ჩაერიცხათ დეკემბრის თანხა, იმიტომ რომ მათი ანგარიშის მონაცემები ჰქონდა ფინანსურ დეპარტამენტს პარლამენტში. არიან დეპუტატები, რომლებიც არ იყვნენ წინა მოწვევის დეპუტატები, შესაბამისად მათი მონაცემები არ ჰქონდა საფინანსო დეპარტამენტს და ასეთი ზოგიერთი დეპუტატი მიმართავს ახლა საფინანსო დეპარტამენტს ანაზღაურების მოთხოვნით", — განაცხადა კობახიძემ.

ოპოზიციური პარტიები, რომლებმაც ცესკოს მონაცემებით ბარიერი გადალახეს ბოიკოტის რეჟიმში არიან და პარლამენტში შესვლაზე უარს ამბობენ, ამიტომ პარლამენტი ერთპარტიულია და მხოლოდ ქართული ოცნების დეპუტატებითაა დაკომპლექტებული. პარტიების უმეტესობამ მანდატებზე უარი თქვა და საპარლამენტო სიებიც ჩახსნა. დანარჩენები კი ფასილიტატორების ჩართულობით მმართველ გუნდთან მოლაპარაკებებს ელოდებიან და მხოლოდ ამის შემდეგ აპირებენ მანდატებზე უარის თქმას ან პარლამენტში შესვლას.

25 დეკემბერს ცნობილი გახდა, რომ ოპოზიციის რამდენიმე წევრს პარლამენტის დეპუტატის ხელფასი ჩაერიცხა. როგორც პარლამენტში განმარტავენ, მიუხედავად იმისა, რომ დეპუტატების ნაწილმა პარლამენტს მანდატების გაუქმების მოთხოვნით მიმართა, ოფიციალურად, ჯერ კიდევ დეპუტატები არიან. ამიტომ, დაერიცხათ შესაბამისი ანაზღაურება.

პარლამენტში აცხადებენ, რომ ვისაც სურს უკან დააბრუნოს აღნიშნული თანხა, შეუძლია ის სახელმწიფო ხაზინაში დააბრუნოს და ამ ხელფასს პარლამენტი სახელმწიფო ბიუჯეტში დააბრუნეს. მათივე თქმით, ვისაც აღარ უნდა რომ დაერიცხოს დეპუტატის ხელფასი, წერილობით უნდა მიმართოს პარლამენტის შესაბამის სამსახურს

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.

გაიგეთ მეტი:

ოპოზიცის ნაწილს დეპუტატის ხელფასი ჩაერიცხა, პარლამენტში განმარტავენ — რატომ