დონალდ ტრამპის ცხოვრებასა და კარიერაში მნიშვნელოვანი სიახლეებია: პირველი - სულ მალე ის თეთრ სახლს დაიკავებს და მეორე - ღამის პეპლების ახლადაღმოჩენილ სახეობას მისი სახელი უწოდეს.

ნეოპალპა დონალდტრამპი (Neopalpa donaldtrumpi) ამ კვირას ონლაინ ჟურნალ Zookeys-ში გამოჩნდა. ღამის პეპელას დამახასიათებელი ფერის "თმა" და მიკროსკოპულად მცირე გენიტალიები აქვს. ის არიზონაში, კალიფორნიაში ბინადრობს.

აღმოჩენის ავტორი ევოლუციური ბიოლოგი ვაზნიკ ნაზარია. ის ნეოპალპების ოჯახს სწავლობდა, როცა შენიშნა, რომ ერთ-ერთი სახეობა აქამდე აღმოჩენილი ყველა ეგზემპლარისგან განსხვავდებოდა. კერძოდ, მას ბევრად პატარა გენიტალიები ჰქონდა, ვიდრე უახლოეს ნათესავს, N ნეონატას. დნმ-ის ანალიზისა და კატალოგების შესწავლის შემდეგ ნაზარი იმ აზრამდე მივიდა, რომ აქამდე უცნობ სახეობასთან ჰქონდა საქმე.

ტრამპი გამონაკლისი არაა. ჯორჯ ბუშის სახელი პატარა ხოჭოს ჰქვია, ხოლო რონალდ რეიგანი ბზიკის ერთ-ერთ სახეობას წარმოადგენს.

მეცნიერი ამბობს, რომ პრეზიდენტის სახელი ღამის პეპელას მხოლოდ ვარცხნილობის გამო დაარქვა.

ვაზნიკ ნაზარმა ტვიტერზეც დაწერა აღმოჩენის შესახებ: ტრამპის სახელი ახალ სახეობას დავარქვი. იქნებ ახლა მაინც დაინტერესდეს პრეზიდენტი ეკოსისტემის კონსერვაციის საკითხით?

დონალდ ტრამპი ტვიტერზე საკმაოდ აქტიურია. ასე რომ, შეგვიძლია მის პასუხსაც დაველოდოთ.