ქუთაისის ხანდაზმულთა პანსიონატის 3 ბენეფიციარსა და 10 თანამშრომელს კორონავირუსი დაუდასტურდა. პანსიონატის დირექტორის, მალხაზ ბადირეიშვილის თქმით, ბენეფიციარებს ვირუსი, სავარაუდოდ, თანამშრომლისგან გადაედოთ. ბადირეიშვილმა On.ge-ს უთხრა, რომ ინფიცირებული ხანდაზმულები 70 წელს ზემოთ არიან, თუმცა მათი ჯანმრთელობის მდგომარეობა ამჟამად სტაბილურია.

"15 სექტემბრიდან ვართ კარანტინის რეჟიმში. ასევე, გრიპზე აცრილი გვყავდა ყველა ბენეფიციარი. ჩემი აზრით, ვირუსი თანამშრომლისგან გადაედოთ, რომელსაც სიმპტომები არ აღენიშნებოდა", — ამბობს მალხაზ ბადირეიშვილი.

რაც შეეხება 10 თანამშრომელს, პანსიონატის დირექტორის თქმით, ისინი თვითიზოლაციაში, სახლში მკურნალობენ.

მისივე თქმით, ქუთაისის ხანდაზმულთა პანსიონატში 92 ბენეფიციარია, თანამშრომელი კი 70-მდე.