ქართული ოცნების აღმასრულებელი მდივნე, ირაკლი კობახიძე ამბობს, ოპოზიციური პარტიები პარლამენტში შევლენ და ამის სათქმელად კონკრეტული საფუძველი აქვს. როგორც მან რუსთავი 2-ის ეთერში განაცხადა, ოპოზიციურ პარტიებთან კონსულტაციები არ მიმდინარეობს, თუმცა ჰგონია, რომ პარლამენტში "სურათი იქნება სათანადო".

"მე მგონია, რომ ეს ასე მოხდება [შევლენ პარლამენტში, როგორც ეს მოხდა 2016 წელს. ამისთვის მაქვს კონკრეტული საფუძველი. დიდი შანსია, რომ ყველა პარტია შემოვიდეს პარლამენტში, აბსოლუტურად ყველა", — განაცხადა კობახიძემ.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება. ასევე, აცხადებენ, რომ გაყალბებას ცესკოს თავმჯდომარეც უწყობდა.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%;

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.