ევროპაში ხელახლა დადგა დღის წესრიგში საკითხი – არის თუ არა კიბოს მაპროვოცირებელი პალმის ზეთი, რომელსაც ნუტელა შეიცავს? პოტენციური საფრთხის გამო, იტალიაში უმსხვილესმა სავაჭრო ქსელმა Cook, პალმის ზეთსა და მის შემცველ ყველანაირ პროდუქტს ბოიკოტი გამოუცხადა. Cook-ს მიბაძა რამდენიმე საკონდიტრო საწარმომ, რომლებმაც თქვეს, რომ ისინი პრევენციის მიზნით არ გამოიყენებენ პალმის ზეთს, რომელიც პოპულარობით სარგებლობს კვების ინდუსტრიაში.

ევროპის კვების უსაფრთხოების ადმინისტრაციამ (EFSA) 2016 წლის მაისში გამოაქვეყნა კვლევის შედეგები, სადაც წერია, რომ 200 გრადუსზე გაცხელების შეთხვევაში, პალმის ზეთი გამოყოფს კანცეროგენულ ნივთიერებებს, რაც საშიშია ჯანმრთელობისთვის. მართალია, პროდუქტის გამოყენება არც აკრძალულა და არც რაიმე რეკომენდაცია გამოცემულა, თუმცა, ითქვა, რომ საჭიროა დამატებითი კვლევები. Reuters–ის ცნობით, EFSA–ს პრესსპიკერმა თქვა, რომ უწყების საბოლოო რეკომენდაცია მიმდინარე წლის ბოლომე გამოქვეყნდება თუმცა, მოსალოდნელი არ არის პალის ზეთის საერთოდ აკრძალვა. შესაძლოა, დაწესდეს გარკვეული ლიმიტები მისი გამოყენებისას.

მსოფლიო ჯანდაცვის ორგანიზაციასა და ამერიკის კვების უსაფრთხოების ადმინისტრაციას ასევე არ გაუვრცელებიათ რეკომენდაცია პალმის ზეთის შეზღუდვის შესახებ, თუმცა, კვლევის პირველადი შედეგების გასაჯაროება საკმარისი აღმოჩნდა საყოველთაო ისტერიის გამოსაწვევად.

მართალია, პალმის ზეთი ასეულობით სხვა საკვებ პროდუქტშიც გამოიყენება, მაგრამ ყველაზე პოპულარული პროდუქტი მათ შორის ნუტელაა, რომელიც გავრცელებული ინფორმაციის გამო ყველაზე მეტად დაზარალდა. ნუტელას მწარმოებელმა კომპანია ფერერომ განაცხადა რომ პალმის ზეთი, რომელსაც ისინი იყენებენ, უსაფრთხოა. როგორც კვლევამ აჩვენა, პალმის ზეთი კანცეროგენს გამოყოფს 200 გრადუსზე დუღილისას. აღნიშნულ პროდუქტს სწორედ 200 გრადუსზე ადუღებენ დამუშავებისას, რათა ის გათავისუფლდეს სპეციფიური სუნისა და წითელი ფერისგან.

როგორც Reuters წერს, პალმის ზეთი ყველაზე იაფი მცენარეული ზეთია და ის 1 ტონა $800 ღირს, მზესუმზირის ზეთის ფასი კი $845–ია. იმ შემთხვევაში, თუ ნუტელა წარმოებაში პალმის ზეთს მზესუმზირის ზეთით ჩაანაცვლებს, მისი ხარჯები წელიწადში რამდენიმე მილიონით გაიზრდება.

ფინანსური ხარჯის გარდა, ფერეროს წარმომადგენელი ამბობს, რომ გემოსა და არსებულ კონსტინტენციას ნუტელას სწორედ პალმის ზეთი აძლევს და თუ ის სხვა ზეთით შეიცვლება, ეს იქნება "უკან გადადგმული ნაბიჯი", რადგან ეს მთლიანად შეცვლის პროდუქტს. გარდა ამისა, ფერეროს მტკიცებით, ისინი განსხვავებული მეთოდით ამუშავებენ პალმის ზეთს და არ ადუღებენ 200 გრადუსამდე, რაც ასევე გამორიცხავს კანცეროგნების გამოყოფას.

მიუხედავად იმისა, რომ ნუტელას მწარმოებელი უკვე რამდენიმე კვირაა პროდუქტის უსაფრთხოებაში დასარწმუნებლად აქტიურ სარეკლამო კამპანიას ატარებს, სულ უფრო მეტი სავაჭრო ქსელი ამბობს უარს პალმის ზეთის შემცველი პროდუქტის გაყიდვაზე.