ამერიკულ-ქართული განათლების ცენტრის ორგანიზებით და ესპანურ IE University-სა და რუმინულ Babeş-Bolyai University-სთან თანამშრომლობით 2020 წლის 10 ოქტომბერს, 12:00-დან 18:00 საათამდე გაიმართება განათლების საერთაშორისო ვირტუალური გამოფენა, რომელიც უმასპინძლებს 22 უნივერსიტეტს 13 ქვეყნიდან. ყველა დაინტერესებულ პირს გამოფენაზე შეეძლება მიიღოს ამომწურავი ინფორმაცია უნივერსიტეტისა და მისი პროგრამების შესახებ. მათ შეეძლებათ პირადად დაუკავშირდნენ უნივერსიტეტის წარმომადგენლებს და დაუსვან მათთვის საინტერესო კითხვები.

განათლების ვირტუალური გამოფენაში მონაწილეობის მისაღებად საჭიროა გაიაროთ რეგისტრაცია შემდეგ ბმულზე: leafonlinefair.com

Ball State University (BSU) არის სახელმწიფო კვლევითი უნივერსიტეტი ინდიანას შტატში, ქალაქ მანსიში. უნივერსიტეტი 1918 წელს დაარსდა ძმები ბოლების მიერ. ძმები ბოლები იყვნენ ამერიკელი მეწარმეები, Ball Corporation-ის დამფუძნებლები.

1960-იან წლებამდე უნივერსიტეტი სასწავლო კოლეჯის სახით არსებობდა. 1965 წელს ძმები ბოლების საპატივსაცემოდ კოლეჯს ბოლ სთეით უნივერსიტეტი ეწოდა.

უნივერსიტეტი საბაკალავრო, სამაგისტრო და სადოქტორო პროგრამების მრავალფეროვან არჩევანს გვთავაზობს.

BSU-ში წარმოებს 120-მდე საბაკალავრო და 80-მდე სამაგისტრო პროგრამა. ასევე 16 სადოქტორო პროგრამა. უნივერსიტეტში ასევე ხელმისაწვდომია სასერტიფიკატო კურსები და ორმაგი დიპლომის პროგრამები.

BSU შედგება რამდენიმე კოლეჯისაგან.

R. Wayne Estopinal College of Architecture and Planning - სადაც ისწავლება ურბანული დიზაინი, არქიტექტურა, მშენებლობის მენეჯმენტი და ინტერიერის დიზაინი.

Miller College of Business - სადაც ისწავლება ბიზნესთან და მეწარმეობასთან დაკავშირებული სპეციალობები, როგორიცაა ფინანსები, ფინანსური აღრიცხვა, მენეჯმენტი, მარკეტინგი და სხვა.

College of Communication, Information, and Media - აღნიშნული კოლეჯი კონცენტრირებულია ჟურნალისტიკასა და ტელეკომუნიკაციებზე.

College of Fine Arts - ხელოვნება, მუსიკა, თეატრი და ცეკვა.

College of Health - კოლეჯში ისწავლება ფსიქოლოგია, სამხედრო მეცნიერებები, ჯანდაცვა და ა.შ.

College of Sciences and Humanities - კოლეჯი კონცენტრირებულია საბუნებისმეტყველო და სოციალურ მეცნიერებებზე. აქ ისწავლება ისეთი სპეციალობები, როგორიცაა ქიმია, ბიოლოგია, კომპიუტერული მეცნიერებები, გეოგრაფია, ისტორია, კრიმინოლოგია, ფილოსოფია, ფიზიკა, სოციოლოგია და სხვა.

Teachers College - საგანამანათლებლო ფსიქოლოგია, დაწყებითი კლასების განათლება, სპეციალური საჭიროების მქონე პირთა განათლება და ა.შ.

უნივერსიტეტს დიდი გამოცდილება აქვს დისტანციური სასწავლო პროგრამების კუთხით და 100-ზე მეტ პროგრამას სთავაზობს სტუდენტებს დისტანციურ რეჟიმში.

საერთაშორისო სტუდენტებისთვის ბაკალავრიატის დონეზე, 12-18 კრედიტამდე სწავლის საფასური წელიწადში გახლავთ $25 126. ყველა საუნივერსიტეტო გადასახადთან ერთად, მათ შორის ცხოვრებასთან და კვებასთან ერთად წელიწადში BSU-ს ღირებულება გახლავთ $37 928.

მაგისტრატურაზე, წელიწადში 18 კრედიტის აღების შემთხვევაში სწავლის საფასური არის თითქმის $21 000 წელიწადში. ყველა საუნივერსიტეტო გადასახადთან ერთად, მათ შორის ცხოვრებასთან და კვებასთან ერთად წელიწადში BSU-ს ღირებულება მაგისტრანტი სტუდენტებისათვის გახლავთ $33 700.

უნივერსიტეტი ფინანსური საჭიროების მქონე ან მაღალი აკადემიური მოსწრების მქონე სტუდენტებს სწავლის დაფინანსების რამდენიმე შესაძლებლობას სთავაზობს, როგორც გრანტებითა და სტიპენდიებით, ასევე სტუდენტური სესხით.

თქვენ გაქვთ შესაძლებლობა პირადად შეხვდეთ ბოლ სთეით უნივერსიტეტის წარმომადგენელს განათლების საერთაშორისო ვირტუალურ გამოფენაზე 10 ოქტომბერს, 12 საათიდან 18 საათამდე. შემოგვიერთდით: leafonlinefair.com