ქართული ოცნების ლიდერი ირაკლი კობახიძე ნაციონალურ მოძრაობას ფაშიზმსა და ადოლფ ჰიტლერის ხელისუფლებას ადარებს. მისი თქმით, ოპოზიციას ხშირად იმიტომ აკრიტიკებენ და ყოფილ ხელისუფლებაზეც იმიტომ საუბრობენ, რომ ხალხს არ დაავიწყდეს, როგორი იყო რეჟიმი.

"1945 წლის შემდეგ ათწლეულები გავიდა, მაგრამ დღესაც კი ახსენებენ გერმანულ საზოგადოებას იმას, რა მძიმე რამე იყო ფაშიზმი. რაც შეეხება ნაციონალურ მოძრაობას, ისინი ფორმებით არავითარ შემთხვევაში არ განსხვავდებოდნენ. მათი საქმიანობის ფორმებიც ეს იყო ძალადობა და სიცრუე. ჩვენ მუდმივად უნდა შევახსენოთ ქართულ საზოგადოებას, განსაკუთრებით ქართველ ახალგაზრდებს ის, თუ როგორი აღარ უნდა იყოს ხელისუფლება.

განსხვავებით ჰიტლერისგან, ამ პოლიტიკური პარტიის წარმომადგენლები დღემდე რჩებიან ქართულ პოლიტიკაში სხვადასხვა მიზეზის გამო. ეს არის დამატებითი მიზეზი, რატომაც ქართულ საზოგადოებას ჩვენ კიდევ ერთხელ უნდა შევახსენოთ, როგორი იყო ეს პოლიტიკური ძალა", — განაცხადა კობახიძემ.

ქართული ოცნების თავმჯდომარემ, ბიძინა ივანიშვილმა პარტიის ეკონომიკური პროგრამის წარდგენაზეც ყოფილი ხელისუფლება ლანძღა. ივანიშვილმა დიდი დრო დაუთმო იმაზე საუბარს, რომ წინა ხელისუფლებამ "ვერ აირიდა ავანტიურა", დაიწყო ომი და მთავარსარდალი ომის დროს "ლაჩრულად" გაიქცა ბრძოლის ველიდან. წინა ხელისუფლებას მან მედიის, სასამართლოს, ბიზნესის ადამიანის უფლებების შეზღუდვაც წამოაძახა.

"თავს ვალდებულად მივიჩნევ, ერთგვარი ანგარიში ჩავაბარო ჩემს ხალხს, და ვაჩვენო, სად ვიყავით 8 წლის წინ, როდესაც ხელისუფლება გადავიბარეთ, და სად ვართ ახლა.

რამდენადაც არასასიამოვნო მოსასმენი უნდა იყოს, ჩვენ უდავოდ ვალდებულნი ვართ ობიექტურად შევაფასოთ და, არა მარტო ჩვენს ხალხს, არამედ მთელ მსოფლიოს, საქართველოს ყველა მოკავშირესა და მეგობარს, კიდევ ერთხელ, პირუთვნელად და მიუკერძოებლად შევახსენოთ, როგორი დესპოტური და კაცთმოძულე ხელისუფლების პირობებში მოუწია ქართულ საზოგადოებას ცხოვრება, 2012 წლის პირველ ოქტომბრამდე, რა მემკვიდრეობა ჩავიბარეთ წინა ხელისუფლებისაგან, და რისი გაკეთება შევძელით განვლილი ურთულესი წლების განმავლობაში", — განაცხადა მან.

ეს პირველი შემთხვევა არ არის, როდესაც ივანიშვილი და მისი გუნდი საკუთარ წარმატებებზე საუბრის ნაცვლად, დროს ყოფილი ხელისუფლების კრიტიკას უთმობს.

გაიგეთ მეტი: