მოძრაობა არა ონის კასკადს (აოკ) და რიონის ხეობის გადარჩენისთვის რიონზე დაგეგმილი ჰესების მშენებლობას აპროტესტებს. მოთხოვნის საფუძველზე ვებგვერდზე manifest.ge პეტიციაა შექმნილი, სადაც ხელმოწერებს აგროვებენ.

მათი თქმით, რაჭასა და ლეჩხუმში ჰიდროელექტროსადგურების მშენებლობა არამხოლოდ მდინარე რიონის ხეობასა და ბუნებას, არამედ რაჭის, ლეჩხუმის, ქუთაისის მოსახლეობასა და რეგიონების მდგრად განვითარებას უქმნის საფრთხეს.

პეტიციის ავტორების განცხადებით, გარემოს დაცვისა და სოფლის მეურნეობის სამინისტრომ ადგილობრივი მოსახლეობის პოზიცია არცერთ პროექტზე არ გაითვალისწინა და პროექტებზე გარემოსდაცვითი გადაწყვეტილებები ადგილობრივების სათანადო ჩართულობის გარეშე, კანონდარღვევით გაიცა.

მოძრაობა არა ონის კასკადს (აოკ) და რიონის ხეობის გადარჩენისთვის მთავრობისგან ონისა და ნამახვანის ჰესების მშენებლობისა და საქართველოს მაღალმთიან რეგიონებში რისკის შემცველი პროექტების განხორციელების შეწყვეტას, რაჭის ეროვნული პარკის შექმნას და ჰიდროელექტროსადგურებზე გაფორმებული ხელშეკრულებების გასაჯაროებას მოითხოვს.

მოთხოვნების შეუსრულებლობის შემთხვევაში პეტიციის ავტორები აცხადებენ, რომ საერთაშორისო ორგანიზაციებს მიმართავენ და პერმანენტულ აქციებს გამართავენ.