ფრაქცია ქართული ოცნების დეპუტატი, რევაზ არველაძე ამბობს, რომ კორონავირუსის გამო შემოღებული საგანგებო მდგომარეობა და კომენდანტის საათი არ უნდა გაუქმებულიყო. პარლამენტში სიტყვით გამოსვლის დროს მან COVID-19-ის მზარდ რიცხვებზე ისაუბრა.

რევაზ არველაძე ფიქრობს, რომ სექტემბერში შემთხვევების რაოდენობის ზრდის გამო საგანგებო მდგომარეობა და კომენდანტის საათი უნდა დაწესდეს და არჩევნებამდე რამდენიმე დღით ადრე უნდა გაუქმდეს.

"მე ვფიქრობ, რომ ასეთი მდგომარეობა შემაშფოთებელია და უნდა იქნეს შემოღებული საგანგებო მდგომარეობა, ისეთი შეზღუდვებით, რომელიც არ დააზარალებს ან ძალიან მცირედით დააზარალებს ბიზნესს. არჩევნებამდე რამდენიმე დღით ადრე უნდა შეწყდეს ეს საგანგებო მდგომარეობა, რათა არჩევნებმა ნორმალურად ჩაიარაოს და მერე სიტუაციის მიხედვით ან აღდგეს ან არა", — განაცხადა პარლამენტის დეპუტატმა.

გარდა ამისა, მან დააზუსტა, რომ ეს მისი პირადი და არა მმართველი გუნდის აზრია.

საქართველოს მთელ ტერიტორიაზე 21 მარტს გამოცხადებული საგანგებო მდგომარეობა 22 მაისს დასრულდა. საარჩევნკო კოდექსის თანახმად, თუ საქართველოს პარლამენტის არჩევნების თარიღი ემთხვევა საგანგებო ან საომარ მდგომარეობას, არჩევნები ტარდება ამ მდგომარეობის გაუქმებიდან არაუადრეს 45-ე დღისა და არაუგვიანეს მე-60 დღისა.

საპარლამენტო არჩევნები 120/30 მოდელით 31 ოქტომბერს ჩატარდება.