საქართველოს ყოფილი პრეზიდენტი, მიხეილ სააკაშვილი აცხადებს, რომ მისი ხელისუფლების დროს ქვეყანაში რწმენა აღორძინდა და ტრადიციული ფასეულობები გაძლიერდა. ამის შესახებ ის მორიგ ვიდეომიმართვაში საუბრობს, რომელიც მან ფეისბუქით გაავრცელა.

"ქართველმა ხალხმა იცის, ჩემს დროს ეკონომიკა გაიზარდა ოთხჯერ, თქვენს დროს შემცირდა. ჩვენს დროს იყო სწრაფი პროგრესი, მათ შორის საქართველოს პოზიციების დამკვიდრებისთვის მთელ მსოფლიოში, და თქვენს დროს საქართველო პრაქტიკულად გაქრა რუკიდან. ქართველმა ხალხმა კარგად იცის, რომ ჩვენს დროს მოხდა აღორძინება და მკვეთრი გაძლიერება საქართველოში რწმენის, ქართველური ტრადიციული ფასეულობების. ჩვენს დროს აღდგა ბაგრატი და ასეულობით სხვა ძეგლი და თქვენ გაანადგურეთ გელათი. ქართველმა ხალხმა იცის განსხვავება და რაც მეტად შეახსენებთ, მით უკეთესი", — ამბობს სააკაშვილი მიმართვაში.

გარდა ამისა, სააკაშვილი ამბობს, რომ ოპოზიციური ჯგუფების რაღაც ნაწილს მისი ლანძღვის დავალება მისცეს.

"ახლა ხდება რაღაც მონტაჟების გაკეთება ტექნოლოგიების გამოყენებით, რაღაც ჩანაწერების გამოყრა, ნამდვილის თუ ტყუილის. მერე ბილბორდებზე ჩემი და წარსულში თუ ახლა ჩემთან ასოცირებული პირების დახატვა, მოჭყანული სახეების, ხალხის დაშინება "ბუა მოდის", "მგელი მოდის", — აცხადებს სააკაშვილი.

მიხეილ სააკაშვილი ძალა ერთობაშიას პრემიერობის კანდიდატია. მის წარდგენას არაერთგვაროვანი რეაქცია მოყვა ოპოზიციაში. ზოგიერთი პარტია, მათ შორის ევროპული საქართველო აცხადებს, რომ მის კანდიდატურას მხარს არ დაუჭერენ.