ქართული ოცნების თავმჯდომარის, ბიძინა ივანიშვილის განცხადებით, მმართველ პარტიას გაკეთებული საქმეებით თავმოწონება და ტრაბახი არ ჩვევია და ამას უხმაუროდ აკეთებს. ამის შესახებ ივანიშვილმა მთაწმინდის პარკში განაცხადა, სადაც ქართული ოცნება საარჩევნო სიის ოცეულს წარადგენს.

"მე არა ერთხელ მითქვამს და დღესაც გავიმეორებ — ჩვენ არ გვჩვევია გაკეთებულით თავმოწონება და ტრაბახი, საქმის კეთება მმართველი გუნდის პირდაპირი ვალდებულებაა და ჩვენ ამას უხმაუროდ ვაკეთებთ. მე მიხარია, რომ ყველა ამ სიკეთით, რომელიც ხალხისთვის კეთდება, სარგებლობენ მათ შორის ჩვენი კრიტიკოსები და სკეპტიკოსებიც კი, მიუხედავად იმისა, რომ ამ სიკეთეების აღიარების უნარი არ გააჩნიათ", — განაცხადა ივანიშვილმა.

მისივე თქმით, დარწმუნებულია, რომ ქართული ოცნება ისევე წარმატებით მოიგებს ბრძოლას სიცრუესთან და "ხალხში ნეგატივის, უიმედობის დათესვის მცდელობასთან", როგორც აჯობეს "ზოგადსაკაცობრიო გამოწვევას კრიზისის ყველაზე რთულ ეტაპზე". ზოგადსაკაცობრიო გამოწვევაში, ივანიშვილი, სავარაუდოდ, კორონავირუსს გულისხმობს.

"ადამიანებზე ზრუნვა და ამ ურთულეს კრიზისში მათი სოციალური მხარდაჭერა, ქართული ოცნების ხელწერად იქცა. თამამად ვიტყვი, ჩვენ პირნათელი ვართ ხალხის წინაშე, ვაკეთებთ შესაძლებლობების მაქსიმუმს, რის საშუალებასაც ჩვენი ქვეყნის ეკონომიკა იძლევა. თუმცა, ისიც კარგად ვიცით, რომ ჯერ კიდევ შორს ვართ სასურველი შედეგისგან, მაგრამ ვადგავართ იმ გზას, რომელიც ნაბიჯ-ნაბიჯ, აუცილებლად მიგვიყვანს მიზნამდე. ჩვენს სწორ და თანამიმდევრულ მიდგომებს, პოლიტიკურ და ეკონომიკურ სტრატეგიას იწონებენ და მხარში გვიდგანან ჩვენი პარტნიორი და მეგობარი ქვეყნები, მაგრამ რაც ყველაზე მნიშვნელოვანია ჩვენთვის, ამას აღიარებს ჩვენი ხალხი და ამიტომაც, დარწმუნებული ვართ, კვლავ უპირობოდ გამარჯვებული გამოვალთ იმ პოლიტიკურ კონკურენციაში, რომელმაც სულ რამდენიმე დღის წინ ოფიციალურად აიღო სტარტი", — განაცხადა ივანიშვილმა პარტიის ღონისძიებაზე.

მისივე თქმით, ხალხი კარგად ხედავს, რომ ქართულმა ოცნებამ "პრაქტიკულად ყველა მიმართულებით შეძლო ქვეყნის შეუქცევადი განვითარება", ასევე, უსაფრთხოებისა და განვითარებისათვის "მტკიცე გარანტიების შექმნა".

ყოფილი პრემიერმინისტრის მტკიცებით, ქართული ოცნების გამარჯვება "თითოეული მოქალაქისთვის სიმშვიდის და უკეთესი ცხოვრების მომტანია". ივანიშვილმა ასევე თქვა, რომ მათი გამარჯვება საქართველოში "მშვიდობის შენარჩუნების, ქვეყნის დემოკრატიული და სტაბილური განვითარების გარანტიაა".