ცელნამგალა ვეშაპი, სახელად ტალეკვა, ისევ დედა გახდა. როგორც ვეშაპების კვლევის ცენტრი იტყობინება, მან ერთი კვირის წინ იმშობიარა და უკვე შენიშნეს ხუან-დე-ფუკას სრუტეში, რომელიც კანადასა და ამერიკას შორის მდებარეობს.

მეცნიერების ცნობით, ახალშობილი ჯანმრთელად გამოიყურება.

ფოტო: Center for Whale Research

ფოტო: Center for Whale Research

ფოტო: Center for Whale Research

ფოტო: Center for Whale Research

ცელნამგალა, იგივე მკვლელი ვეშაპების ორსულობა 17-დან 18 თვემდე გრძელდება. მისი ორსულობის შესახებ მკვლევრებმა დრონით გადაღებული ფოტოებიდან შეიტყვეს. სურათები 2019 წლის სექტემბერში და 2020 წლის ივლისშია გადაღებული.

2018 წელს ტალეკვა გარდაცვლილ შვილს კვირების განმავლობაში არ უშვებდა. ის მკვდარ ახალშობილს წყნარი ოკეანის სანაპიროსთან 17 დღის განმავლობაში ატარებდა, რომ არ ჩაძირულიყო. მგლოვიარე დედამ მასთან ერთად 1 600 კილომეტრზე მეტი გაიარა.

ვეშაპები სოციალურ ჯგუფებად ცხოვრობენ და წყლის ბინადრების რეაბილიტაციისა და კვლევის ცენტრის ინფორმაციით, სამივე ჯგუფში არიან ორსული ცხოველები. დროში თანხვედრა მეცნიერებისთვის უჩვეულო ფენომენს არ წარმოადგენს, თუმცა, როგორც მკვლევრები ამბობენ, ბოლო პერიოდში, მათი ორსულობა წარუმატებლად სრულდება.

2019 წელს მსგავსი ქცევა შენიშნეს დელფინებშიც, როცა ახალი ზელანდიის სანაპიროებთან დედა გარდაცვლილ შვილს დღეების განმავლობაში დაატარებდა და ასე გამოხატავდა გლოვას. ახალი ზელანდიის კონსერვაციის დეპარტამენტი ამბობდა, რომ ზრდასრული ძუძუმწოვრის ქცევა შვილთან ემოციურ მიჯაჭვულობას გამოხატავდა.