განურჩევლად იმისა, თუ რამდენად მოსაწყენი ან დამღლელია თქვენი სამუშაო, უნდა აღიაროთ — თანამშრომლები სამუშაო გარემოს ბევრად უკეთესს ხდიან. სამსახურში ყოველთვის არის ხოლმე ის ერთი ადამიანი, რომელთანაც მეგობრობთ და ხუმრობთ იმ გარემოში, რომელიც, სხვა მხრივ, საკმაოდ სერიოზული და საქმიანია.

და რა მოხდება, თუ გეტყვით, რომ ასეთი თანამშრომლის ყოლა კიდევ უფრო სახალისოა, როცა ის ადამიანი კი არა, კატაა? დიახ, სწორად გაიგეთ: ავსტრალიის ერთ-ერთ საავადმყოფოში სამსახურში კატა აიყვანეს.

წარმოგიდგენთ ელვუდს — ფისოს, რომელიც ეპვორთის საავადმყოფოს მიწებზე წესრიგის სადარაჯოზე დგას.

ელვუდი, წითურ-თეთრი ზოლიანი კატა, მელბურნის ეპვორთის საავადმყოფოს შესასვლელთან ბოლო ერთი წლის განმავლობაში თითქმის ყოველდღე მოდიოდა. ის მთელი დღე ხან შესასვლელს "იცავს" და ამოწმებს, ვინმეს დამატებითი ყურადღება ხომ არ სჭირდება, ხან კი, უბრალოდ, ბუჩქების მახლობლად მზეს ეფიცხება. მოკლედ, როგორც ფისოებს სჩვევიათ ხოლმე.

ერთ დღეს, როდესაც ჩანტელ ტროლიპი — საავადმყოფოს ერთ-ერთი თანამშრომელი — სამსახურში მოდიოდა, მან შენიშნა, რომ ელვუდს ყელზე რაღაც ეკეთა. ახლოდან შესწავლის შემდეგ მან დაინახა, რომ, როგორც ჩანს, ვიღაცამ კატა სამსახურში აიყვანა და ეპვორთის დაცვის გუნდში გააწევრიანა.

"მასზე ID ბეჯი პირველად ივნისში შევნიშნე. იმ დღეს მოულოდნელი არითმიული სიკვდილის სინდრომის შემთხვევა მქონდა, მაგრამ მისი ბეჯის ხილვამ ხასიათი მთლიანად გამომისწორა! სულ პირველად როცა ვნახე, ყელზე არაფერი ჰქონდა, ამიტომ მიუსაფარი კატა მეგონა, მაგრამ მოგვიანებით ვიღაცამ საყელო გაუკეთა, ბოლოს კი თავისი ID ბეჯით დამხვდა, რომელიც ჩვენი ნამდვილი სამუშაო ბეჯების იდენტურია, მეორე მხარეს საკონტაქტო კოდებიც კი აქვს", — თვა ტროლიპმა.

როგორც ჩანს, საჯარო წესრიგისადმი ელვუდის ასეთი მწვავე ინტერესი უყურადღებოდ არ დარჩა და ის დაცვის სამსახურში აიყვანეს. გილოცავთ, ელვუდ! თუმცა, ისიც უნდა აღინიშნოს, რომ ფისოს ყოველდღიური რუტინა დიდად არ შეცვლილა და ის ძველებურად ისევ ორი რამითაა დაკავებული — დარაჯობს კარს და ეფიცხება მზეს.

"საყვარელი და მეგობრული ფისოა, თუმცა ზედმეტად მოსიყვარულე არ არის. მოფერება უყვარს, მაგრამ ხანმოკლედ — მალევე იწყებს ხოლმე მოძრაობას. ნუ, ბოლოს და ბოლოს, დაცვად მუშაობს და ყველა შემსვლელ-გამომსვლელი უნდა შეამოწმოს", — თქვა ტროლიპმა.

თავიდან არავინ იცოდა, საიდან მოვიდა ელვუდი, თუმცა ცოტა ხნის წინ გაირკვა, რომ ის გზის მეორე მხარეს ნამდვილ ოჯახთან და ტყუპისცალ ძმა ჯეიკთან ერთად ცხოვრობს. გზის ამ მხარეს ის, უბრალოდ, სამსახურში გამოსაცხადებლად გადმოდის.

"საავადმყოფოში შესვლა არასდროს უცდია, თუმცა, მგონი, ისედაც ზედმეტად პატარაა იმისთვის, რომ ავტომატური კარის სენსორი გაააქტიუროს და გააღოს", — დაამატა ტროლიპმა.

როცა ტროლიპს ჰკითხეს, უკვე რამდენი კრიმინალური აქტივობა შენიშნა ელვუდმა, მან თქვა:

"მგონი, ნებისმიერ პოტენციურ კრიმინალს მისი სისაყვარლის დანახვისას გეგმები წყალში ეყრება. 'მიაუს' ისე თბილად ამბობს, რომ ყველა, ვისაც ცუდი განზრახვა აქვს, მაშინვე შეიცვლის განწყობას. ჰოდა, ალბათ, ეს საქმის შესრულების მისებური გზაა".