დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ცენტრის ხელმძღვანელის, ამირან გამყრელიძის თქმით, COVID-19-ის ვაქცინის წარმოება ფინალურ ეტაპზე შედის და შესაძლოა, გვიან შემოდგომაზე იგი უკვე დაამტკიცონ.

"დღეს კლინიკურ კვლევას გადის ცხრამდე ვაქცინა, სამი მესამე ფაზის კვლევებშია, ამიტომ შესაძლებელია გვიან შემოდგომაზე მარეგულირებელმა ორგანოებმა დაამტკიცონ რამდენიმე ვაქცინა. ვაქცინების გლობალური ალიანსის კოორდინირებით მიმდინარეობს მუშაობა ქვეყნებთან ვაქცინის შესაძლო მიწოდებასთან დაკავშირებით და ამ მოლაპარაკებებში ჩართულია საქართველოც", — ამბობს გამყრელიძე.

მისივე თქმით, არსებობს პირობები, თუ როგორ და რა ეტაპები უნდა გაიაროს ქვეყანამ ვაქცინის მისაღებად და ამაზე საქართველოც მუშაობს. გამყრელიძის განცხადებით, სწორედ, ეს განიხილეს დღეს საკოორდინაციო საბჭოზე და პრემიერიმინისტრ გიორგი გახარიასგან შესაბამისი დავალებებიც მიიღეს.

26 აგვისტოს მონაცემებით, საქართველოში კორონავირუსის 7 ახალი შემთხვევა გამოვლინდა.

ინფექციური საავადმყოფოს სამედიცინო დირექტორის, მარინა ეზუგბაიას თქმით, 7 დადასტურებული შემთხვევიდან 1 დაავადებულთან კონტაქტია, 4 — შემოტანილი შემთხვევა და მათ შორის 2 სატვირთო ავტომობილის მძღოლია, ხოლო 2 კი სამედიცინო პერსონალია.

ჯამში, საქართველოში კორონავირუსის დადასტურებულ შემთხვევათა რაოდენობა 1 436-მდე გაიზარდა, გამოჯანმრთელებულია 1 150 ადამიანი, გარდაცვლილი კი — 19.კარანტინის რეჟიმში რჩება 6 018 პირი, სტაციონარში მეთვალყურეობის ქვეშ კი 249 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: