გერმანიის კანცლერის, ანგელა მერკელის სპიკერმა განაცხადა, რომ რუსი ოპოზიციონერი პოლიტიკოსი, ალექსეი ნავალნი, სავარაუდოდ, მოწამლეს. ამის შესახებ ინფორმაციას გერმანული გამოცემა დოიჩე ველე საკუთარ ტვიტერზე აქვეყნებს.

"ეჭვი არის არა ის, რომ ნავალნიმ თავი მოიწამლა, არამედ ის, რომ პოლიტიკოსი ვიღაცამ მოწამლა. მსგავსი მოწმავლის მაგალითები რუსეთის ბოლო წლების ისტორიაში არა ერთი თუ ორი არსებობს. ნათელი იყო, რომ მისი ჩამოყვანის შემდეგ უსაფრთხოების ზომები უნდა მიგვეღო, რადგან, სავარაუდოდ, საქმე გვაქვს ადამიანთან, რომელიც მოწამვლის სამიზნე გახდა", — განაცხადა სპიკერმა.

მისივე თქმით, აუცილებელია, რომ ნავალნის პირადი დაცვა ჰყავდეს.

რუსეთში, ომსკის ჯანდაცვის უწყება ამტკიცებს, რომ რუსი ოპოზიციონერის, ალექსეი ნავალნის ორგანიზმში არა საწამლავის, არამედ ალკოჰოლისა და კოფეინის კვალი იყო. სწორედ ომსკის საავადმყოფოდან გადაიყვანეს ნავალნი ბერლინში ოჯახის წევრების მოთხოვნით.

ნავალნის თანაგუნდელები აცხადებდნენ, რომ ოპოზიციონერის ორგანიზმში მომაკვდინებელი ნივთიერება აღმოაჩინეს, რომელიც საფრთხისშემცველია გარშემომყოფებისთვისაც.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. ის ამ დრომდე უგონო მდგომარეობაში იმყოფება. ნავალნი საავადმყოფოში მას შემდეგ მოხვდა, რაც ტომსკი-მოსკოვის რეისზე თავი შეუძლოდ იგრძნო. ავიალაინერში მასთან ერთად მყოფი პრესმდივნის თქმით, ის, მოწამლეს. იარმიში ასევე ამბობს, რომ დილით ნავალნიმ მხოლოდ ჩაი დალია.

ალექსეი ნავალნი ვლადიმერ პუტინის ყველაზე დიდი ოპოზიციონერია. პოლიტიკური აქტიურობის გამო ის მოსკოვში არაერთხელ დააკავეს და ადმინისტრაციული პატიმრობაც მიუსაჯეს. პირველ ჯერზე საპატიმრო დაწესებულებაში მან ათი დღე გაატარა. ადამიანის უფლებათა ევროპულმა სასამართლომ რუსეთს დაავალა, რომ ოპოზიციონერ ალექსეი ნავალნის 11-თვიანი შინაპატიმრობისთვის თითქმის 23 ათასი ლარი გადაუხადოს.