ევროპული საქართველოს ერთ-ერთი ლიდერის, გიგა ბოკერიას თქმით, ევროპული საქართველო ბიძინა ივანიშვილთან კოალიციას გამორიცხავს. ასე ეხმაურება ის ქართული ოცნების დეპუტატის, რეზო არველაძის განცხადებას, რომელმაც თქვა, რომ თუ არჩევნებში "ოცნებას" ხმები დააკლდება, პარტნიორობის შესაძლებლობას პატრიოტთა ალიანსთან ერთად ევროპულ საქართველოსთანაც ხედავს.

"ისინი რას გამორიცხავენ და რას არა, მაგაზე მე ვერაფერ ვერ ვიტყვი. მე რას გამოვრიცხავ, ეგ შემიძლია გითხრათ — ჩვენ, ევროპული საქართველო გამოვრიცხავთ ივანიშვილთან კოალიციას, იმიტომ რომ ეს კაცი, მისი პერსონიდან გამომდინარე, მისი ხედვა, მისი გარემოცვა არის საფრთხე საქართველოს მომავლისთვის", — განაცხადა ბოკერიამ.

მისივე თქმით, ევროპული საქართველო იქნება გარანტი იმისა, რომ ოპოზიციური კოალიცია შედგება.

"დანარჩენ ოპოზიციასთნ არათუ გამოვრიცხავ, დაკვეთაა ქართული საზოგადოების 70 პროცენტის, რომ კოალიცია შედგეს. და ეს კოალიცია შედგება, ჩვენ ვიქნებით ამის გარანტი, ევროპული საქართველო", — აცხადებს გიგა ბოკერია

ქართული ოცნების დეპუტატმა რეზო არველაძემ განაცხადა, რომ იმ შემთხვევაში თუ ქართულ ოცნებას მთავრობის შესაქმნელად ხმები დააკლდება, პარტნიორობის შესაძლებლობას პატრიოტთა ალიანსთან ხედავს. რეზო არველაზე აზუსტებს, რომ ეს მისი პირადი პოზიციაა და პარტიასთან შეთანხმებული არ არის. დეპუტატისვე თქმით, თუ ქართული ოცნების კოალიციას პატრიოტთა ალიანსთან თანამშრომლობის შემდეგაც არ ექნება საკმარისი ხმები მთავრობის დასაკომპლექტებლად, იგი ევროპულ საქართველოსთან თანამშრომლობასაც გამართლებულად მიიჩნევს.

არველაძის განცხადებას მისი თანაგუნდელი, გიორგი ვოლსკი გამოეხმაურა და თქვა, რომ ქართული ოცნება კოალიციური მთავრობის შესაქმნელად პატრიოტთა ალიანსთან თანამშრომლობას არ აპირებს. დეპუტატი ამის მიზეზად პარტიის საგარეო პოლიტიკურ შეხედულებებს ასახელებს, რომელსაც "ქვეყნისთვის დამაზიანებელს" უწოდებს.