აეროპორტების გაერთიანების ინფორმაციით, ხვალიდან, 24 ივლისიდან რეგულარული რეისები ნატახტარიდან მესტიისა და ამბროლაურის აეროპორტების, ხოლო თბილისიდან ბათუმის აეროპორტის მიმართულებით განახლდება.

მათივე განცხადებით, 2020 წელი პრემიერ-მინისტრის ინიციატივით, შიდა ტურიზმის წლად გამოცხადდა. ამიტომ შიდა ტურიზმის პოპულარიზაციის მიზნით შიდა ფრენების განვითარებას დიდი ყურადღება დაეთმობა.

"შიდა ტურიზმის სტიმულირების მიზნით, შიდა ფრენების დაწყება მნიშვნელოვანია, ამას ელოდება, განსაკუთრებით როგორც ჩვენი ქვეყნის მთიანი რეგიონის მოსახლეობა, ისე ადგილობრივი ვიზიტორებიც. მოლოდინი რომ დიდია, ეს ბილეთების გაყიდვაზეც აისახა — ამ დროისთვის არსებული ინფორმაციით, უკვე 300-ზე მეტი ბილეთია სხვადასხვა მიმართულებით გაყიდული", — აცხადებს თამარ არჩუაძე, აეროპორტების გაერთიანების ხელმძღვანელი.

უწყების ცნობით, შიდა ფრენებზე ბილეთის ფასი არ შეცვლილა და ის 2019 წლის ნიშნულზე დარჩა.

საქართველოს აეროპორტების გაერთიანების ხელმძღვანელი ასევე ამბობს, რომ აგვისტოდან მესტიის მიმართულებით რეგულარული რეისები კვირაში 5 სიხშირით შესრულდება, ამბროლაურის მიმართულებით კვირაში 3-ჯერ, ბათუმის მიმართულებით კი ფრენა კვირაში 4-ჯერ იქნება ფრენები შესაძლებელი.