ქართული ოცნების დეპუტატი ირაკლი კობახიძე ფიქრობს, რომ ოპოზიცია სასამართლოში ვერ იჩივლებს მმართველი გუნდის მხრიდან მიმართვის ფორმების გამო. მიზეზად კი იმას ასახელებს, რომ ეს პოლიტიკური განცხადებები და ფაქტის კონსტანტაციაა, რადგან ნაციონალური მოძრაობა "კრიმინალური ოპოზიციაა".

მისი თქმით, ენმ-ს დეპუტატი რომან გოცირიძე, რომელმაც შესაძლო სამართლებრივ რეაგირებაზე ისაუბრა არც იურისტია, რომ სასამართლოს მიმართოს და "არც კომპეტენტურია".

"კრიმინალური ოპოზიცია? სასამართლოს როგორ უნდა მიმართონ ამასთან დაკავშირებით? რომან გოცირიძე არც იურისტია და არც კომპეტენტური კაცია ზოგადად. კუპონით არის ცნობლი მთელი თავისი ბიოგრაფიის მანძილზე და იურისტი მითუმეტეს არ არის. შესაბამისად, ეს არის ჩვეულებრივი პოლიტიკური განცხადება.

შეფასებითიც კი არ არის, როდესაც კრიმინალურ ოპოზიციას ვუწოდებთ ნაცმოძრაობას თავისი კლასტერებით, ეს ფაქტის კონსტანტაციაა. ეს არის ჭაკუების პოლიტიკური პარტია, რურუების პოლიტიკური პარტია, უგულავების პოლიტიკური პატია. ესენი არიან ცნობილი კრიმინალები, სასამართლოს მიერ მსჯავრდებული კრიმინალები: სააკაშვილი, ადეიშვილი, მერაბიშვილი და ა.შ." — განაცხადა მან პალიტრანიუსის ეთერში.

წამყვანის დამაზუსტებელ კითხვაზე, რატომ განავრცობს ის რამდენიმე პირის ნასამართლეობას მთელ ოპოზიციაზე და სასჯელმოხდილ ადამიანს რატომ მოიხსენიებს კრიმინალად, კობახიძე პასუხობს:

"ზოგს მოხდილი აქვს, ზოგი გაქცეულია, ზოგი ციხეშია. ვისაც მიყავს პროცესი ოპოზიციაში, ვინც განსაზღვრავს პროცესებს ისინი ყველა კრიმინალები არიან.

როდესაც ადამიანი არის მსჯავრდებული კრიმინალში, ის პოლიტიკაში არ რჩება. არცერთ ცივილიზებულ ქვეყანაში. რესოციალიზაცია შეიძლება მოხდეს სხვა სფეროში, მაგრამ არცერთი ადამიანი, რომელიც მხილებულია კრიმინალში, პოლიტიკაში არ რჩება", — განაცხადა მან.

მმართველი გუნდი სხვადასხვა დროს ოპოზიციას "ხალხის მტრებად", "პოლიტიკურ გოიმებად", "კურდღლებად" მოიხსენიებდა. პასუხად ირაკლი კობახიძე ამბობს, რომ შეურაცხმყოფელია, როდესაც ევროპული საქართველოს დეპუტატი გიგა ბოკერია მათ უწოდებს "კლოუნებს", რადაგ ეს არ არის შეფასება ან ფაქტის კონსტანტაცია.

შესაძლოა, ნაციონალურმა მოძრაობამ სიძულვილის ენის გამოყენების გამო ქართული ოცნების წინააღმდეგ სასამართლოს მიმართოს. პარტიაში ამბობენ, რომ ამასთან დაკავშირებით გადაწყვეტილება მიღებული არაა, თუმცა მმართველი პარტიის მხრიდან გამოყენებული სიძულვილის ენის გამო საერთაშორისო პარტრნიორებისა და არასამთავრობო ორგანიზაციებისთვის მიმართავსაც გეგმავენ.

როგორც ნაციონალური მოძრაობის წევრი, ხატია დეკანოიძე ამბობს, ხელისუფლება საზოგადოებაში პოლარიზაციის გაღვივებას ხელს უწყობს.

"ხელისუფლების წარმომადგენლების მხრიდან, მუდმივად ვისმენთ ძალიან მძიმე სიძულვილის ენას. გვიწოდებენ რადიკალებს, კრიმინალებს. მათ შორის პარლამენტის მაღალი ტრიბუნიდან პრემიერი არ ერიდება ძველბიჭურ გარჩევებს ოპოზიციის მიმართულებით. ეს არის სიძულვილის და დაპირისპირების ენის გაღვივება, რომელიც საზოგადოებაში პოლარიზაციას, ვითარების დამძიმებას უწყობს ხელს", — აცხადებს დეკანოიძე.

მისივე თქმით, ხელისუფლება არა საქართველოს მოქალაქეებს, არამედ, მხოლოდ ივანიშვილს ესაუბრება და ამ სიძულვილის ენასაც მხოლოდ მის გასაგონად, საამებლად იყენებს.