საქართველოს მთავრობის მიერ დაგეგმილი ცვლილებების მიხედვით, 2017 წლიდან ავტომობილებზე ქონების გადასახადის გადახდა სავალდებულო ხდება. ინფორმაციას ამის შესახებ საინფორმაციო სააგენტო bpn.ge ავრცელებს.

კერძოდ, კანონპროექტის მიხედვით, ცვლილებები საგადასახადო კოდექსის 201- ე, 202-ე და 205-ე მუხლებში შევა და 40 ათას ლარზე მეტი წლიური შემოსავლის მქონე ოჯახებს შეეხება.

როგორც bpn წერს, პროექტში აღნიშნულია, რომ ქონების გადასახადის წლიური განაკვეთი სხვადასხვა დროს გამოშვებულ ავტომობილებზე განსხვავებული იქნება.

"კერძოდ, ფიზიკური პირი, რომლის ოჯახის წლიური შემოსავალი 40 000 ლარზე მეტია, ვალდებული ხდება გადაიხადოს ქონების გადასახადი მის საკუთრებაში მყოფ მსუბუქ ავტომობილზე. ქონების გადასახადის წლიური განაკვეთი დიფერენცირებულია ავტომობილის ასაკის მიხედვით და განისაზღვრება შემდეგი ოდენობით, ლარებში“, - სააგენტოს ინფორმაციით, სწორედ ეს წერია საქართველოს საგადასახადო კოდექსში შესატანი ცვლილების შესახებ კანონპროექტში.

საინფორმაციო სააგენტოს ცნობით, 10 და მეტი წლის ავტომობილზე გადასახადი 60 ლარი იქნება, 5–დან 10 წლამდე – 120, 1–დან 5–მდე – 240, ხოლო 1 წლის – 500 ლარი.

On.ge ცდილობს ინფორმაციის გადამოწმებას. ჯერჯერობით, აღნიშნული კანონპროექტი პარლამენტში ოფიციალურად არ არის შესული.