უმრავლესობის წევრი, ირაკლი კობახიძე, რომელმაც ოპოზიციას "ძროხა" უწოდა, ამბობს, რომ ის ადეკვატურ და პირდაპირ შეფასებებს აკეთებს. მისივე განმარტებით, მსგავსი ენით იმიტომ საუბრობს, რომ ოპოზიციას "სამეცნიერო ხარისხი" არ აქვს.

"ოპოზიციას არც სამეცნიერო ხარისხი არ აქვს და განცხადებებიც აბსოლუტურად არაადეკვატური აქვს. ამიტომ გავაკეთე გუშინ ის განცხადება. ოპოზიცია მთლიანად დაკარგულია, სასოწარკვეთილია და სწორედ ამით არის განპირობებული მათი ყველა მცდარი ნაბიჯი, რომელიც გადაიდგა განსაკუთრებით ბოლო პერიოდის განმავლობაში. ისინი ოქტომბერში ძალიან მძიმე მარცხისთვის არიან განწირული და ბუნებრივია, ესეც იწვევს მათ სასოწარკვეთას. მე ადეკვატური და პირდაპირი ვარ, ზუსტად ვაფასებ იმ რეალობას, რაც დღეს არის ჩამოყალიბებული ქართულ პოლიტიკასა და ქართულ ოპოზიციაში", — განაცხადა კობახიძემ.

ირაკლი კობახიძის თქმით, ოპოზიცია ძროხას უფრო ჰგავს, ვიდრე ხარს. ამ კომენტარით გამოეხმაურა ის მედიასთან დეპუტატ ეკა ბესელიას შეფასებას, რომელმაც თქვა, რომ კობახიძე საარჩევნო სიის სათავეში ხარისთვის აფრიალებულ წითელ ნაჭერს ჰგავს.

"ოპოზიციას რაც შეეხება, ხარზე მეტად, ძროხას უფრო ჰგავს, ეს არის ოპოზიციის შეფასება. ეს არის რეალობა, რასაც ხედავს. საზოგადოება. რაც შეეხება წითელ ნაჭერს, ბუნებრივია, მე მზად ვარ, რომ გავაგრძელო წითელი ნაჭრის ფუნქციის შესრულება ოპოზიციისთვის იქიდან გამომდინარე, რომ ძალიან მნიშვნელოვანია, ოპოზიციას საკუთარი ადგილი მიეჩინოს", — თქვა ირაკლი კობახიძემ.

კობახიძის მხრიდან ოპონტების მიმართ მსგავსი შეფასებები პირველი არაა. იგი ოპონენტების მისამართით სხვადასხვა ეპითეტებსა და ფრაზებს ხშირად იყენებს, მაგალითად, მან ოპოზიციას "გოიმიც" უწოდა.