ერთიანი ნაციონალური მოძრაობის პოლიტსაბჭოს მდივანი, ნიკა მელია ამბობს, რომ 2020 წლის საპარლამენტო არჩევნებში მაჟორიტარობის კანდიდატი იქნება, თუმცა ჯერ არ აქვს გადაწყვეტილი სად. როგორც მელიამ TV პირველის ეთერში თქვა, მისი გადაწყვეტილება დამოკიდებული იქნება იმაზე, რამდენად ძლიერი კანდიდატი ეყოლება ოპოზიციას თბილისის იმ ოლქში, სადაც თავადაც შეიძლება ჰქონდეს "მაღალი შანსები".

"ეს დამოკიდებული იქნება საერთო შეთანხმებაზე. მე განვიხილავ თბილისში ერთ-ერთ ოლქს და დასავლეთ საქართველოს, სამეგრელოს, ან თბილისი. იმის მიხედვით იქნება გადაწყვეტილება მიღებული ჩემი მხრიდან, თუ გვეყოლება ძლიერი კანდიდატი თბილისის იმ ოლქში და ანგარიშგასაწევი, სადაც მე ვთვლი, რომ შეიძლება მქონდეს მაღალი შანსები. ვისაც მეტი შანსი ექნება რომელიმე ცალკე აღებულ ოლქში, ის უნდა დადგეს", — თქვა მან.

მელიამ ასევე აღნიშნა, რომ ამის გამო "სიხარულისგან მეცხრე ცაზე" არ არის, მაგრამ არჩევნებში მონაწილეობა მისი ვალდებულებაა.

"ვალდებულება არის ყველა პოლიტიკური ლიდერის. გითხრათ, რომ სიხარულისგან მეცხრე ცაზე ვარ, ვიყო მაჟორიტარობის კანდიდატი ნებისმიერ ოლქში, არა, მაგრამ ვალდებულებაა, ეს არის ბრძოლა, ომი პოლიტიკური. ვერანაირად ვერ გაექცევი. კი, რა თქმა უნდა, მე ვიქნები ერთ-ერთ ოლქში მაჟორიტარობის კანდიდატი. ეს მოითხოვს ძალიან დიდი ენერგიას, ძალისხმევას, შრომას კიდევ უფრო მეტს. დრო სჭირდება ყველაფერს, მომზადებას, კამპანიის დაგეგმვას, ველზე მუშაობაც დიდი შრომას მოითხოვს, მაგრამ ტვირთიც ასეთია ლიდერის ნებისმიერის", — აღნიშნა მან.

2020 წლის არჩევნები ოქტომბერში ჩატარდება. ოპოზიციისა და ქართულ ოცნების შეთანხმების მიხედვით, პარლამენტში მხოლოდ 30 მაჟორიტარი უნდა იყოს, 120 დეპუტატი კი პროპორციული სიით აირჩიონ. თუმცა ცვლილებები ამ დრომდე მიღებული არ არის.