თბილისის მერი, კახა კალაძე მეტროს რეაბილიტაციაზე ოპოზიციის ბრალდებებს პასუხობს. დღეს, 15 მაისს კალაძემ ჟურნალისტებს უთხრა, რომ მათ უკეთ იციან, სად უნდა მოიკითხონ "კორუმპირებულები, თაღლითები, მაიმუნები და მეტრუპეები".

"როგორც ჭავჭავაძის გამზირთან მიმართებით მოგხვდათ "სიმართლის მუშტი" ცხვირ-პირში, იგივე მოგხვდებათ ახლაც. ეს კონკრეტული ტენდერი მუნიციპალური განვითარების ფონდმა გამოაცხადა. ესაა აზიის განვითარების ფონდის ფარგლებში განსახორციელებელი პროექტი, სადაც ტენდერში თურქულმა კომპანიამ გაიმარჯვა. თურქული კომპანია არის ის, რომელსაც ჩვენთან აქვს ვალდებულება, სამუშაოები შედგეს ხარისხიანად", — განაცხადა თბილისის მერმა და კონკრეტული კონტრაქტორების შესახებ კითხვა კომპანიასთან გადაამისამართა.

ნაციონალური მოძრაობის წევრი, ლევან ხაბეიშვილი მთავარ არხთან ამბობს, რომ თბილისში მეტროსადგურების სარეაბილიტაციო სამუშაოებს ის კომპანიები ახორციელებენ, რომლებსაც მაღალი ძაბვის კაბელებზე მუშაობის გამოცდილება არ აქვთ.

მისივე ცნობით, მაღალი ძაბვის კაბელებთან მუშაობენ ყოფილი ფეხბურთელები, მაგალითად, გიორგი ნემსაძე, ან ტარიელ ხეჩიკაშვილი და მასთან დაკავშირებული კომპანიები.

"ოთხი კომპანიიდან ორს საერთოდ არანაირი გამოცდილება არ აქვს, მეტიც, ერთი 2020 წლის თებერვალშია დაფუძნელებელი და მაისში უკვე მეტროში ჩაუშვეს. ეს ხალხი დირექტორიანად არც კი იგუგლება, რომ ნათურა მაინც აქვს შეცვლილი. რომელიც იგუგლება, ამ კომპანიის დირექტორი არის გიორგი ნემსაძის და ტარიელ ხეჩიკაშვილის ბიზნესპარტნიორი და "იბერია ავტოს" დირექტორიც", — აცხადებს ხაბეიშვილი.